Янги Ўзбекистонликларни табақалаштириб кесилган суюнчи пули қайтариладими? Фискал стратегия бўйича Давлат бюджет харажатлари таркибида хурсанд қиладиган жиҳатлардан бири ижтимоий нафақалар, моддий ёрдам ва аҳолига имтиёзли тўловларнинг оша бошлаши билан боғлиқ. Агар бюджетга киритиб, тасдиқлай олинса (серхаражат ўзбек амалдорлари қаршилик кўрсатмаса), ижтимоий нафақа ва ёрдам/компенсация пуллари 2027 йилда 18,5 трлн.сўмгача ошади. Лекин ўзингизга тасаввур қилишингиз учун шунда ҳам 2022 йилдаги шундай харажатлар миқдорига етиб борилмайди. Яна қайтарамиз, 4 йил аввал Ўзбекистон бюджети харажатлари каррасига ижтимоийроқ бўлган. Ўзбекистон ижтимоий давлат деб эълон қилингач, айнан ижтимоий аҳамиятга эга харажатлар кесилиб, қирқила бошлаган. Шулардан бири иккинчи ва ундан кейинги туғилган фарзандлар учун бериб келинган суюнчи пулининг тўхтатилиши билан боғлиқ. На Иқтисодиёт ва молия вазирлиги, на Бандлик ва камбағалликка қарши кураш вазирлиги, на Ижтимоий ҳимоя агентлиги суюнчи пулини кесиб тежалган маблағлар қайси йўналишга ишлатилгани ҳақида маълумот беришган. Лекин бюджет харажатлари таркибига қарасангиз, ижтимоий нафақалар қисқартирилиб, суюнчи пули кесилгандан кейин айнан амалдорларнинг харажатлари кескин кўпайганига гувоҳ бўласиз (1,2). Балки мана энди адолат тикланар? Суюнчи пулини тиклашдан бошлаш керакдир ишни? Наҳотки янги Ўзбекистон янги Ўзбекистонликлар кўпайганидан қувонмаса? Ижтимоий нафақадан қисиш учун муҳтожларни сарсон қилиш ва турли манипуляцияларни қўллашга барҳам берилар (янги Ўзбекистондаям янги камбағаллар пайдо бўлиши мумкин, худди АҚШда, ЕИда ҳам бўлгани сингари).