Гўшт ишлаб чиқариш статистикаси тўлиқ қайта кўриб чиқилиши керак Рўйхатга олиш пайтида қорамол, қўй ва эчкилар сони миллионлаб бошга кам чиққанидан кейин гўшт ишлаб чиқариш билан боғлиқ статистика тўлиқ қайта кўриб чиқилиши зарур эди. Кечаги катта йиғилишда гўштга бўлган йиллик талаб 2 миллион 150 минг тоннани, ишлаб чиқариш ҳажми эса 1 миллион 600 минг тоннани ташкил этмоқда, дея презентация қилинган. Презентациялардаги рақамлар қаердан олинган ёки кимнинг ижоди (балки "чорва вазирлигининг"), билмайман, лекин 2025 йил якунлари бўйича статистикада қарийб 3 млн.тонна гўшт ишлаб чиқарилганлиги кўрсатилган. Бунча гўшт ростан ишлаб чиқарилган бўлса, ҳар ойда бир неча ўн минг тонна гўшт импорт қилармидик? Ички ишлаб чиқаришнинг абгорлиги ва импортга қанчалик қарам бўлиб қолганимизни импорт чекланиб қолган февраль-май ойлари кўрсатди-ку. Қолаверса, айтилган рақамлардан келиб чиқилса, йилига 550 минг тонна гўшт импорт қилиниши керак. Лекин бу рақам ҳам импорт статистикасига умуман тўғри келмайди. Ўзимизни ўзимиз чиройли рақамлар билан алдашни тўхтатишимиз керак. Шундагина тўғри қарорлар бошланади. Ҳамма гап шундаки, ўзи йўқ қўй-мол деҳқон ва томорқа хўжаликлари номига ёзиб келинавергани сингари, гўшт ҳам шу хўжаликларга тиркалаверган. Эҳтимолки, рўйхатга олиш ишларидан кейин ҳам бунақа методологиядан воз кечилмаган. 2026 йил ярим йиллигида 1,3 млн.тонна гўшт етиштирилган (ўсиш 0,9%), лекин 2025 йил ярим йиллигида қарийб 1,4 млн.тонна гўшт етиштирилганди. Кулишниям, йиғлашниям билмайсан бу рақамларга (ўзи бутун қишлоқ хўжалиги статистикаси қайта кўриб чиқилиши зарур, зеро ҳозирги рақамларга ишонилса, томорқаларда нафақат миллионлаб тонна гўшт етиштирилмоқда, миллионлаб тонна ғалла ҳам). Гўшт билан боғлиқ ечимларда айни хатоларни яна ва яна такрорлаш эса тўхтагани йўқ. Таклифларда яна натурал хўжаликлар — аҳоли хонадонларида қорамол боқиш масаласи илгари сурилган. 2018-2024 йилларда чорва учун дея ажратилган ўнлаб триллион кредитлар ўзлаштирилгани, ўртамчилар ва шериклар воситасида совурилгани, қорамол ва қўй-эчки боши кўпайиш ўрнига камайгани дарс бўлмадими? Нега Аргентина бўп кетмадик? Энди аҳолига енгил конструкцияли молхона қуриш учун деб триллионлаб кредитлар ажратиладими? Бу сафар кимлар маза қилади? Банкирларми? Ҳокимиятми? Ё яна чўнтак воситачилар? Наҳотки натурал ва майда хўжалик юритиш билан гўшт ишлаб чиқариш ҳажмини ошириш ҳам, таннархини тушириш ва рақобатбардошлик ҳам иложсиз эканини тушуниш ва тан олиш шунчалар қийин?