Эрталабгача камбағалликдан чиқариш мумкинми? Жойларда камбағал оилаларни камбағалликдан чиқариш бўйича ҳокимларнинг мажлислари сони кескин кўпайган ва еттиликларга оилаларни камбағалликдан чиқариш режа-топшириқлари берила бошланган. Ўтган ҳафтадаги катта йиғилишда камбағалликни қисқартириш бўйича вазифалар йил давомида ва йил охиригача қўйилган бўлса-да, маҳаллий даражада ижро учун берилаётган муддатлар ва мажбурлаш чоралари абсурд даражага етаётган ҳолатлар ҳам бор. Ҳартугул, Камбағалликни қисқартириш ва бандлик вазирлиги охирги кунларда жойларда юз бераётган воқеалар ва вазиятдан хабардор кўринади. Вазирликнинг расмий баёнотига кўра, ижтимоий реестр"даги фуқароларни асоссиз ёки мажбуран реестрдан чиқариш ҳолатлари ҳам кузатилмоқда. Қайд этилишича, бу фуқароларнинг давлат томонидан кафолатланган ижтимоий ҳимоя ва кўмаклардан фойдаланиш имкониятидан маҳрум бўлишига олиб келиши мумкин.