Рўйхатдан ўтказиш жараёни инқилобий даражада соддалашади Шунақа яхши ва умидли ҳужжатлар лойиҳалари пайдо бўлганида эртанги кунга нисбатан сўнаётган ишончлар яна учқунлай бошлайди. Давлат ва фуқаро муносабатларидаги жараёнлар фақат соддалаштириш томон ўзгариб бориши лозим. Таклиф этилаётган лойиҳада шундай ишораларни кўриш мумкин. Хусусан, 2021 йил 1 мартдан бошлаб фуқаролик ҳолати далолатномаларини қайд этиш, никоҳланувчи шахсларни тиббий кўрикдан ўтказиш, хорижга чиқиш биометрик паспортини расмийлаштириш, тиббий-ижтимоий эксперт комиссияларида кўрикдан ўтиш ва транспорт воситаларини мажбурий техник кўрикдан ўтказиш экстерриториал тамойил бўйича амалга оширилади. Яъни пропискага боғланган хизмат кўрсатиш сони яна камаяди. Шу ўринда, нега биопаспорт (ID карта) расмийлаштириш ёки автомашиналарга давлат рақамларини беришни ҳам пропискага боғламай амалга ошириш мумкин эмас, деган савол туғилади. Хоҳиш бўлса кифоя. Давлат хизматлари агентлиги юридик шахсларни давлат рўйхатидан ўтказиш бўйича ягона ваколатли орган этиб белгиланаётгани ҳам олдинга ташланган яна бир қадам. Дарвоқе, банклар ва кредит бюроларининг ҳам Давлат хизматлари агентлигида рўйхатдан ўтиши тўғри иш. Марказий банк регулятор сифатида рўйхатдан ўтган банклар ва кредит бюроларига лицензия беради ва улар устидан пруденциал назоратни таъминлайди. Жисмоний шахснинг шахсий идентификация рақамининг (ЖШШИР) рақамли идентификация учун ягона рақамга айланаётганини ҳам олқишлаш лозим. Энди ЖШШИР СТИР ва бошқа барча идентификация кодларини ўрнини эгаллайди. Лойиҳа билан танишинг, таклифлар билдиринг.