Мулк ҳуқуқи - қуш ҳуқуқи Жиззахда қулаган тураржой бўйича газетаўз яхшигина суриштирув амалга оширипти. Эътиборли жиҳати, бу объект аввал бошдан икки ё уч қаватли нотураржой объекти сифатида қурилиши мўлжалланган. Кейин йўл ёқасида бўлгани сабабли "снос"га тушиши эҳтимолини камайтириш мақсадида бинога яна бир неча қават қўшиш ва юқори қаватларини тураржойга айлантириш фикрига келинган. Чунки тураржойларни бузиш масаласида, қанчалик безбет бўлмасин, маҳаллий ҳокимият сал ўйлаб иш кўради. Мулк ҳуқуқи қуш ҳуқуқига айланган учинчи дунё мамлакати учун бу нормага айланиб бўлган. Бундай амалиёт Ўзбекистон бўйича, айниқса Тошкентда юзлаб, минглаб топилади. Тошкентда бузилган гаражлар ўрнида ер ажратиш қарорларини бир кўтаринг, аксари бир ёки икки қаватли бинолар учун қарор чиқарилган, амалда 6, 7, 8, 9 қаватли уй-жойлар қурилаяпти. Энди вилоятлардаги аҳволни ўзингизга тасавур қилаверинг. Иккинчи эътиборли ҳолат ер ажратиш тўғрисидаги қарор Barakali Qorako’l Chorvador фермер хўжалигига чиққани билан, қурилиш ишларини амалда бошқа компания олиб борган. Фермер хўжалиги раҳбари бу объект бўйича барча ҳуқуқларни бошқа компанияга ўтказиб берганини қайд этган. Тасаввур қилинг, А компанияда ҳокимга киришга ва соққасини бериб ер олишга "доступ" йўқ. Лекин Б компанияда бундай имконият бор, чунки у ҳокимнинг синфдоши, дўсти, собиқ ҳамкасби, ўйнаши ёки шунчаки ишонарли жиноий шериги. Шунинг учун одатда, ер ажратиш Б компанияга қарор чиқариш билан рўй беради. Бир муддат ўтиб, қурилиш бошлаш арафасида Б компания объект бўйича барча ҳуқуқларни А компанияга топширади. Албатта соққаси бозор нархларида келишилади. Бундай схемалар Ўзбекистонда, айниқса Тошкентда нормага айланиб бўлган. Қурилиш кетаётган объектларни бир текшириб кўринг, ярмидан кўпида объект эгаси аллақачон ўзгарган. Чунки ҳокимбувалар Туробжон Жўраев ишидан кейин чемоданда пора олмай қўйганлар, фақат ишонарли одамларга ер ажратадилар ва ишонарли одамлар орқалигина ўша ер учинчи шахсларга пулланиб ўтказиб берилади, албатта бозор нархида. Суриштирувдан учинчи мужда шуки, ер сотишдан қурилишгача бўлган жараён энг пастдан энг юқоригача аллақачон жиноийлашиб, мафия элементларини жамлаб спрут ясаб бўлган. Бу спрутни спрутни яратган ва унинг ичидаги одамлар бартараф эта олишмайди, куф-суф қилинади, узоғи кичикроқ қурбон қони тўкилади. Ундан ортиғини кутманг, умид ҳам қилманг. @the_bankiroff