Қўшнинг кўр бўлса, кўзингни қис Ўтган йили октябрда ҳокимиятни куч ишлатиш йўли билан эгаллаб олган, бандит ўтмишга эга Садир Жапаровнинг ошнаси Акилбек Жапаров Қирғизистон президентини хон деб эълон қилишни таклиф этмоқда. Акилбек Жапаров ҳозирда иқтисодиёт ва молия вазири ҳисобланади. Ўтмишда Қирғизистоннинг барча президентлари даврида юқори лавозимларда ишлаган, хусусан Акаев ва Бакиев даврида ҳукумат аъзоси ҳисобланган. 2010 йилдан токи Садир Жапаров ҳокимиятни зўравонлик билан эгаллаб олгунча парламент депутати бўлган. Дунёнинг энг биққи ва қашшоқ ҳудудларидан ҳисобланадиган Марказий Осиё мамлакатларида ҳокимиятга келганлар ўзларини турли титуллар билан ёрлақашни хуш кўрадилар. Ит ва Отлар ишқибози Гурбангули Бердимуҳаммедов - Аркадаг, собиқ совхоз директори Имомали Раҳмон - Миллат пешвоси, отдан тушсаям эгардан тушишни истамай турган Назарбоев эса - Элбоши титуллари билан ўзларини ўзлари (ёки шотирлари) сийлаган. Эътибор берсангиз соҳибларининг ақли ва зеҳни қанчалар қуйига инган бўлса, титуллар шунчалар баландпарвоз жаранглайди. Мазкур титуллар уларнинг эгаларига Конституция ва қонунларга тупуриб қўйиб чексиз ҳокимиятни муддатсиз эгаллаб туриш имкониятларига йўл очган.