Учтепада янги мактаб қуриш кўзда тутилмаган, лекин 3,7 трлн.сўмга сити қурилади. Учтепа туманини комплекс ижтимоий-иқтисодий ривожлантириш чора-тадбирлари тўғрисидаги қарор лойиҳаси муҳокамага қўйилди. Лойиҳа туманда келаси 2 йилда турли манбалар ҳисобига амалга ошириладиган лойиҳаларни ўз ичига қамраган. Эътиборлиси, рўйхатга киритилган лойиҳаларнинг энг қиммати Учтепада сити қурилиши билан боғлиқ. Режага кўра 3,7 трлн.сўмлик Сити келаси йили декабргача битиши керак. Лекин аҳолиси табиий ва ички миграция ҳисобига ўсиб бораётган туманда лойиҳага кўра биронта янги давлат мактабининг қурилиши кўзда тутилмаган. Ёлғон бўлмасин, рўйхатда акс этган биттагина мактаб қурилиши мавжуд. У ҳам бўлса хусусий (балки аллақачон қурилиб бўлган ҳам). Шунчаки галочка учун киритиб қўйилганга ўхшайди. Шунингдек 44- мактаб учун қўшимча 640 ўринли бино қуриш ҳам кўзда тутилган. Бўлди. Нафақат Учтепада, бутун Тошкент шаҳри бўйича мактаб етишмаслиги оддий халқ учун асосий муаммо. Балки кабинетларда ўтирган, бизнес билан чатишиб кетган амалдорлар буни ҳис этишмас. Чунки уларнинг фарзандлари ё фалон миллион сўмлик хусусий мактабга боради ёки киборлар учун аталган, оддий халқ учун ёпиқ давлат мактабларига қатнайди. Давлат мактабларида синфларда меъёрларда белгиланганидек 35тагача эмас, 40-45талаб ўқувчи ўқиётгани улар учун умуман оғриқли эмас. Фарзандининг келажагини ўйлаган ота-оналар ойлик даромадининг ярмидан кўпини хусусий мактабга сарфлашга мажбур бўлаётгани масаласи ўзбек чиновникларининг парвоига келмайди. Тепада кимдир пойтахтдаги мактаблардаги реалликдан хабардорми ўзи? Бошланғич синф ўқувчилари иккинчи сменага бораётганидан, ўқувчилар сони ҳаддан зиёд кўплигидан давлат мактабларида таълимда сифат деган нарсанинг ўзи қолмаганидан-чи? Таълим сифати назорати бўйича Инспекция деган ташкилот бор. Адашмасам, раҳбари бир неча карра спарринг номзод ролини қойилмақом қилиб ўйнаб берган Кетмонов. Шу ташкилот нима қилаяпти ўзи? Ҳозирги мактабдаги зичликни қўя турайлик, аҳоли сонининг ўсаётгани, урбанизация фаоллашаётгани ҳисобга олинса, йилига мамлакат бўйича юзлаб мактаб қуриш керак. Қанақадир ситилар эмас. @the_bakiroo