Fitch Ўзбекистонда иқтисодий ўсиш прогнозини 3,1%гача пасайтирди Янгиланган прогнозга кўра, жорий йилда Ўзбекистоннинг реал иқтисодий ўсиш суръати 3,1 фоизни ташкил қилади. Аввалги мониторинг даврида Fitch тарафидан 2022 йилда 5,5%лик ЯИМ ўсиши прогноз қилинган эди. Агентлик Ўзбекистон суверен кредит рейтингининг баҳоси ВВ- (барқарор) даражасида ўзгаришсиз қолдирган. Fitch'га кўра, иқтисолий ўсиш суръатларининг сусайиши пул ўтказмалари камайиши туфайли уй хўжаликлари истеъмолининг камайиши, инвестиция лойиҳаларининг кечикиши, ташқи қарз жалб қилиш шартларининг қатъийлашиши, валютанинг кўпроқ қадрсизланиши ва юқорироқ инфляция кутилмалари билан изоҳланади. Агентликка мувофиқ, миллий валюта курсининг пасайиши, юқорироқ инфляция кутилмалари ва озиқ-овқат нархлари сабабли 2022 йилда инфляция даражаси ўртача 12,7 фоизни ташкил қилади. Ўзбекистоннинг суверен кредит рейтинги қуйидаги ҳолларда пасайтирилиши мумкин: · ташқи молиявий кўрсаткичлар ёмонлашганда, пул ўтказмаларининг доимий камайиши, ташқи савдо дефицитининг ошиши ва тўғридан-тўғри хорижий инвестициялар соф ҳажмининг камайиши сабабли жорий операциялар ҳисоби манфий сальдосининг ортиши, халқаро захираларнинг сезиларли даражада камайиши ёки ташқи мажбуриятларнинг тез ошиши; · иқтисодий ўсиш суръатининг давомий секинлашиши, давлат шартли мажбуриятларининг давлат томонидан қопланиши туфайли давлат қарзининг ЯИМга нисбати кескин ошиши ёки суверен фискал буферларнинг камайиши.