Яна битта кэптив лойиҳа: водий учун янги аэропорт 10 кун аввал Давлат раҳбари самарасиз ва истиқболсиз лойиҳаларни тугатиш тўғрисида гапирган бўлса-ю, бугун водийда янги халқаро аэропорт қуриш ҳақида сўз очиб туришса, изоҳлашга сўз топиш жуда қийин бўларкан. Ўзи водийдаги учта аэропортнинг қувватидан тўлиқ фойдаланилаётгани йўқ. "Уларни кенгайтириш имконияти чекланган" эмиш. Э барака топгур, аввал бор салоҳиятини ишлатиб олинглар. Бундан 25 йил аввал ҳам Андижон аэропорти кунига 7-8 та рейс қабул қилган. Ҳозир ҳафтасига шунча рейс йўқ. Водийдаги аэропортларни 2 йил аввал ваъда қилинган "Очиқ осмон" режимига ўтказиш ёки шаффоф тендер орқали фойдаланиш ва кенгайтириш шартларида лоукостерларга бошқарувга топшириш ўрнига янги халқаро аэропорт қуришга таклифни жимгина қабул қилиш ёки қарсак чалиб олқишлаш жуда қийин. Бу навбатдаги кэптив лойиҳа бўлади. Худди Ҳумо саройи қурилиши сингари, худди Форумлар саройи қурилиши сингари, худди номини ҳам атагим йўқ, 4 миллиард долларга қурилган ва уч марта очилиш маросими ўтказилган ва ҳалигача ишга тушмаган уч ҳарфли комплекс сингари. Янги аэропортни қуришдан асл мақсад асло авиация бизнесини ва ташувлар ҳажмини оширишга боғлиқ бўлмайди, Агар акси бўлганида аввал моделлаштирилган иқтисодий асослари келтириларди. Бу аэропорт қурилиши лойиҳалаш ва пудрат ишлари билан имкон қадар кўп пул ўзлаштиришга қаратилган навбатдаги миллиард долларлик кэптив лойиҳа бўлади. 6 йиллик тажрибамиз инобатга олинса ва кэптив лойиҳалар ўзлаштирувчиларининг саноқли вакилларини номма-ном билишимиздан келиб чиқилса, аэропорт қурувчисиям яна бегона бўлмайди. Шиширилган ва иқтисодий асосланмаган лойиҳаларни кўз-кўз қилувчиларга Кутаиси аэропорти тарихини ўрганиб чиқишни тавсия этаман. 130 минг аҳолига эга Кутаиси аэропорти орқали 900 минг йўловчи ташилади. Бу худди масалан, Тошкент аэропорти орқали 25 миллион йўловчи ташиш сингаридир. Биз ўнггга, чапга миллиардларни совурадиган ёки мамлакатимизга канадек ёпишиб олган тўртта олигарх ўғрини боқиш учун бутун ресурсларни уларнинг фойдасига тақсимлашга кўз юмадиган бой давлат эмасмиз. Дунёнинг энг қашшоқ 50 давлатидан биримиз. Шуни унутмайлик. @the_bakiroo