​Ходорковский банки сертификатини сотиб олган тошкентлик Дарёўз ҳар куни эълон қилиб бораётган тарихий газеталар шарҳида жуда қизиқ лавҳалар ҳам учраб қолаяпти. 1992 йил 16 апрелда чиққан газеталардан бирида тошкентлик Эркин Тошбоевнинг 1991 йилда "Менатеп" банки сертификатларини сотиб олганлиги ва сертификатларни Тошкентдаги омонат кассалар ва банклар қабул қилмагани ҳақидаги мурожаати чиққан. "Менатеп" банки 1988 йилда Михаил Ходорковский тарафидан ташкил этилган илмий техник банк ҳисобланган. Совет иттифоқи тарқалиши арафасида энг барқарор ва истиқболли хусусий банклардан бўлган. Тошкентлик Эркин ака "Менатеп" сертификатларини сотиб олгани бекорга эмас ва Москвада очилган "Менатеп"нинг Андижонда бўлинмаси бўлгани ҳам ўз-ўзидан эмас. (Дарвоқе, айнан "Менатеп" банкидан намуна ва илҳом олиниб Ўзбекистонда ҳам ёш комсомоллар "Ипак йўли" банки, "Андижонбанк" каби банкларни очишган). "Менатеп" 1990 йиллардаги "гаров аукцияонлари"нинг фаол иштирокчиси бўлган. Ходорковскийнинг Россиянинг энг бой одамига айланишида асосий молиявий инструмент ролини ўйнаб келган. 1997 йилга келиб, Россиянинг энг йирик 5 банкидан бирига айланган "Менатеп" 1998 йил кризисига бардош бера олмаган.