Давлат бюджети даромадларининг деярли учдан бири НКМК ва ОКМК ҳисобига тўғри келади 2022 йил кўрсаткичларини ўз ичига олган "Фуқаролар учун бюджет" нашри эълон қилинди. Очиқланган маълумотларда кўзга ташланадиган жиҳатлардан бири бюджет даромадларининг концентрациялашиб бораётгани билан боғлиқ. Хусусан, 2022 йил бюджет прогнозига кўра бюджет даромадларининг 31,33%и Навоий кон-металлургия ва Олмалиқ кон-металлургия комбинатлари ҳиссасига тўғри келади. Бюджет даромадларининг мазкур икки гигантга - Ўзбекистон олтин-мис тожларига боғлиқлиги йилдан-йилга ошиб бормоқда. Масалан, ўтган йил прогнозида уларнинг давлат бюджети даромадларидаги улуши 26,4% атрофида эди. Айни вақтда бошқа монополист гигантларнинг бюджет даромадлари шаклланишидаги улуши камайиб бормоқда. Масалан, Ўзбекнефтегаз АЖ улуши 5,1%дан 2,25%гача, Ўзтрансгаз АЖ улуши 3,3%дан 1,95%гача, Ўзавтомоторс АЖ улуши 1,5%дан 0,53%гача камайган. Солиқ тўловчиларнинг ТОП-10талигидан Lukoil overseas supply and trading ltd МЧЖ, Unitel МЧЖ ва ўтган йили рус олигархи Усманов назоратига ўтказиб берилган Coscom МЧЖ чиқиб кетган.