UzAuto Motors Spark'ни қимматроқ сотиш учун яшириб "тузламоқдами"? Чайқовчи монополист аввал ҳам бундай усуллардан жуда кўп марта фойдаланган. Тасаввур қилинг, май ойидан буён контрактация учун Spark йўқ. Вазиятни kun.uz ўз суриштирувларида тасдиқлатиб ҳам олган. Контрактация йўқлиги учун Spark автомобилига 50 фоиз пули олдиндан тўлаб қўйганлар ҳам йўқ. Буни @UzAvtoSavdo_bot ва UzAutoSavdo иловаси орқали ҳам текшириб кўришингиз мумкин. Лекин ойма-ой олганда Spark ишлаб чиқариш фақат ўсиб бормоқда, расмий статистикага кўра: январда 323, февралда 567, мартда 1604, апрелда 1526, майда 1708, июнда эса 1815 дона Spark ишлаб чиқарилган. Энди савол: Контратактация йўқ бўлса, олдиндан 50% тўлови амалга оширилган навбат бўлмаса, ишлаб чиқариш фақат ортиб бораётган бўлса, шунча Spark қаёққа кетаяпти? Мантиқий жавоб, назаримизда, битта: Чайқовчи монополист ишлаб чиқарилган Spark'ларни, эҳтимолки, яшириб тузламоқда. Нима мақсадда дейсизми? Қимматроқ сотиш учун. Компания аввалги эпохада сунъий дефицит яратиш ва экспорт кўрсатичларини сохта ошириб кўрсатишнинг усулларидан жуда кенг фойдаланган. Эсингизда бўлса, шу йил қишда йўқ бўлиб қолган Нексия-3 нархлар оширилгандан кейин март ойи ўрталаридан бирдан салонларда пайдо бўлиб қолди. Шунинг учун эртага янги оширилган нархларда, масалан, Spark salted line номи билан таклифлар пайдо бўлиб қолса, ҳечам ҳайрон бўманг. Бу компания омборларида яшириб тузланаётган автомобиллар бўлади.