Пенсионерларни ишдан бўшатиш имконсизга айланади Афсуски, янги таҳрирда қабул қилинган Меҳнат кодексидан ходимнинг пенсия ёшига етганлиги муносабати билан иш берувчининг ташаббусига кўра меҳнат шартномасини бекор қилиш асоси чиқариб ташланмоқда. Лекин иш берувчиларда ҳали амалдаги қонун нормаларини қўллашга яна 6 ой вақт бор (янги таҳрир 6 ой ўтиб кучга киради). Мазкур ўзгартиришлар ўрта ва узоқ муддатли истиқболда бусиз ҳам жуда паст бўлган меҳнат унумдорлигини янада пасайтиради, меҳнат бозорига эркин бозор муносабатлари сингишини секинлаштиради, иш берувчилар ва ёлланма ишчилар эркин танловини мажбуриятларга айлантиради. Янгиланиш, ўзгаришлар, эврилишлар тўхтайди. Шошма-шошарлик билан босилган бу қадам айниқса, давлат секторида, амалдорлар синфининг пенсия ёшидан кейин ҳам лавозимларда қолишини таъминлашга хизмат қилади.