Россияда ўзбекистонлик меҳнат мигрантлари охирги 7 йилда 4 марта ошганми? Ёлғон ва иккиюзламачилик давлат сиёсатига айланган Россиянинг иқтисодий тараққиёт вазири Максим Решетниковга кўра, Россияда ишлаш учун келаётган Ўзбекистонликларнинг сони охирги 7 йилда 4 баробарга ошган. Агар Решетниковга ишонилса, Ўзбекистонда одам қолмаган, ҳамма Россияга мардикорчиликка кетган. Аввал ҳам кўп бора таъкидлаганимиздек, бугунги Россиянинг империяча ва шовинистик мафкураси ҳатто фуқароларнинг мамлакатлар ўртасида ҳаракатланишида ҳам ўзининг касал хоҳишларини ифода этади. Вергул ва абзацлар орқали ўқилса, уларнинг ишоралари аниқ ва осмондан олинган бу рақамлардан мақсади ҳам тайин. Яъниким, биз Россияга қараммиз, узиб бўлмас даражада боғлиқмиз, ўзимизни билиб, уларнинг қош-қовоғига қараб иш тутишимиз керак. Энг ёмони нима биласизларми? Энг ёмони Решетниковга ўхшаганларнинг баёнотларини ҳеч бир текширмай ўзбек ОАВлари ҳам тарқатмоқда. Ўзи аҳвол қанақа? 2023 йил 1 январь ҳолатига Россияда жами 1 223,3 минг нафар ўзбекистонлик меҳнат фаолиятини амалга оширмоқда. Россияда ишлаётган ўзбекистонликларнинг сони 2022 йил 1 январга нисбатан жами 12,8 минг нафарга камайган. Бу рақамлар осмондан олинмаган. Россия Федерациясининг расмий статистикаси. Одатда путин пропагандаси Россияга кирган ўзбекистонлик борки, у туристми, талабами, беморми ё тадбиркорми, ҳаммасини меҳнат мигранти қаторига қўшиб келади. Масалан, Москвага серқатнов ўзбек чиновниклари ҳам уларнинг назарида гўёки мигрант. Албатта, муаммолар йўқ эмас. Меҳнат миграциясини бошқа йўналишларнинг кенгайтириш ҳисобига диверсификациялаш жуда суст кетмоқда. Тегишли агентлик фақат мигрантларни шилиш ва ўртакашлик билан машғул. Ёрдам беришмасин, агарда ҳеч қурса халақит беришмай туришса ҳам ўзбекистонликлар ўзлари учун янги ва янги бозорларни кашф этишда давом этишади. Ва бир нарсани ҳамиша ёдда тутиш зарур. Биз айрим уруғи қуриётган шовинистлардан фарқли ўлароқ кўпаймоқдамиз, энг катта бойлигимиз бўлган нуфусимиз бир кун келиб катта сифатга айланажак.