Текин бўлган ҳар нарса тегар ғашимга Эртага, 30 июнь Ёшлар куни муносабати билан Тошкент шаҳрида 14-30 ёшли йўловчилар учун жамоат транспорти текин бўлар экан. Эмишки, ҳукумат протоколи билан шундай қарорга келинган. Албатта кўпчилик учун гўёки ёқимли иш туюлар, лекин текин нарса йўқлигининг моҳиятини тушунган ҳар қандай одамнинг бу иш камида ғашига тегади. Биринчидан, Тошшаҳартрансхизмат акциядорлик компанияси. Унинг операцион ва бизнес фаолияти юзасидан ҳукумат қарор чиқариши жуда ғалати. Ҳеч тугамаетган зараркунанда микроменежментнинг давоми. Иккинчидан, Тошкент шаҳри учун олинган мингта автобус ва электробус учун кимдир тўлаши керак. Бир неча юз миллион долларлик кредитнинг фоизи ҳар куни чакиллаб томиб, йиғилиб ётипти. Ўзи эгилувчан тарифларга ўтиш вазифаси бўйича Президент топшириғи бўлишига қарамай, бажармай, пайсалга солиб ётишипти. Энди яна эртага бир неча юз минг қатнов учун тушум бўлмайди. Учинчидан, бу популистик қарорнинг маъмурчилиги қандай таъминланади? Ёшларни қандай ажратиб олишади? Улар метрка ва паспортини олиб чиқиши керакми? Табиийки, маъмурчилик имконсизлиги учун бу туйнукдан бошқа йўловчилар ҳам бемалол фойдаланишади. Кондукторлар эса қўл силтаб қўя қолишади (балки план ҳам бўлмас). Тўртинчидан, ҳар қандай имтиёз ва истисно фақат зиён ва адолатсиз экани аллақачон исботланган. Унинг зиенини фақат монетизация юмшатиши мумкин. Айтайлик, юз минг тошкентлик ёшлар фойдаланган имтиёздан юз минг сурхондарелик ё қашқадарелик фойдалана олмайди. Ҳатто мисол учун Тошкентнинг ўзида ўн марта автобусга чиққан 14000 сўмлик имтиезга эга бўлади. Автобусга чиқмай, уйда қолганга эса тешиккулчаям йўқ. Шундай адолатсизлик пенсионерлар учун текин қилиб қўйилган йўлкира масаласигаям тааллуқли.