8 ойлик давлат бюджети дефицити қарийб 40 трлн.сўмга етган Иқтисодиёт ва молия вазирлиги июль-август ойлари якуни бўйича давлат бюджети маълумотларини очиқлади. Ўтган икки ойда давлат бюджети даромадлари 38,1 трлн.сўмни, харажатлари эса 50,3 трлн.сўмни ташкил этган. Биринчи ярим йиллик якунлари бўйича давлат бюджети даромадлари 102,3 трлн.сўм, харажатлари эса 129,7 трлн.сўмдан иборат бўлгани маълум қилинганди. Демак, ўтган 8 ойда давлат бюджетининг умумий дефицити 39,6 трлн.сўмга етган бўлиши мумкин (корректировкалар эҳтимоли соқит қилинмайди). Июль-август ойи даври бюджетининг эътиборли жиҳатлари: Президент тадбиркорлар билан учрашган августда ҚҚСни қайтариш ҳажми июлга нисбатан кескин ошган (июлда 985 млрд.сўм, августда 2,4 трлн сўм). Августда ҚҚС тушумлари июлга нисбатан сезиларли камайган (4,5 трлн.сўмдан 4,0 трлн сўмгача). Фойда солиғининг тушумлари 3,7 трлн.сўмдан 3,1 трлн.сўмгача қисқарган. Бошқа даромадларнинг 3,3 трлн.сўмдан 6,1 трлн.сўмгача ошиши даромадлар пасайиб кетишининг олдини олган (бу дивидендлар ёки хусусийлаштиришдан тушумлар бўлиши мумкин). Иқтисодий тасниф бўйича харажатлар таркибида бошқа харажатлар кескин ошган (5,3 трлн.сўмдан 13,0 трлн.сўмгача). Субсидиялар 946 млрд.сўмдан 1,5 трлн.сўмгача кўпайган.