Yandex.Go (Taxi) солиққа тортиладими? Бу саволни ҳар куни ё ҳар гал Яндекс такси хизматидан фойдаланганда такрорласак ёки ярим миллиондан зиёд аудиторияга эга Хушнудбек кун тартибига олиб чиққанидан натижа бўладими? Яндекс Ўзбекистондан солиқ тўламасдан реал кунлик режимда олиб чиқиб кетаётган пулларининг схемалари ҳақида ёзиш маънога эгами? Асосийси, хавфсизми? Ўзи мисли кўрилмаган молиявий ва маъмурий ресурсларга эга Яндексга атайин ва онгли равишда тақдим этилган имтиёзларига қарши туриш ҳозирги шароитда имконлими? Шартли равишда "Ўзбекистон халқи Яндексга қарши" суд жараёнида судялар холис бўла олишадими? Айтайлик, агар шундай маҳкама ўтказилса, Солиқ қўмитаси Ўзбекистон халқига қарши кўрсатма берадими ё Яндексга қарши? Антимонополия қўмитаси-чи? Яндексни Ўзбекистон ҳуқуқий ва солиқ резидентлигига қайтариш бюджет билан боғлиқ мувозанат издан чиққан бугунги реалликларда энг асосий масалалардан бири бўлиши керак. Лекин бизнинг номимиздан иш кўрадиган, уч соатда ҳар қандай қонунларни ўзгартириб юборишга тайер парламентимиз жим. Ҳукуматимиз жим. Келишиб олинган жимликнинг сабаби Яндекс бенефициарлари шимолдаги оғаларга бориб тақалмайдими?