Қарорларда узвий бўла оламизми? UzAuto Motors энди утилизация йиғимини тўлашни бошлайдими? Lacetti, Damas, Labo ва Cobalt автомобилларининг нархлари 5,13%га оширилгани маълум бўлди. Тўғриси, дефицитли бозор ва прейскурант нархлари ўртасида шаклланган катта фарқ ҳисобга олинса, нархларни юқорироқ фоизда оширилишини ва компания бундан буёғига яширин имтиёзлардан воз кечиб барча солиқ ва йиғимларни тўлашга ўтиши ҳақида баёнот беришини кутгандим. Чунки амалдаги реалликларда Uzauto Motors унинг учун энг катта солиқ ҳисобланган утилизация йиғимини бюджетга эмас, спекулянтларга тўламоқда. Эслатиб ўтаман, ҳар бир Damas ва Labo учун 9,9 млн.сўмдан, Lacetti ва Cobalt учун 39,6 млн.сўмдан утилизация йиғими тўланиши зарур. Лекин бу пуллар илма-тешик бўлиб ётган бюджетга эмас, тўғри бориб спекулянтларнинг чўнтагига тушмоқда. 2023 йилнинг ўтган 9 ойида бюджетга тўланмаган утилизация йиғимининг миқдори 8 трлн.сўмдан ошган. Солиштириш учун, биз ўтган ҳафта шунча миқдордаги қарзни (660 млн.доллар) 8,125%дан жалб қилдик. 2020 йилнинг август-декабрь, 2021 йилнинг январь- май ойлари учун 5,7 трлн.сўм, 2022 йилда 10,0 трлн.сўм атрофида утилизация йиғими бюджетга ўтказилмаган. Акциз ўрнига утилизация йиғими жорий этилган 2020 йил 1 августдан бошлаб ҳисоблаганда Uzauto Motors фақат бир марта - 2021 йилнинг июндан 2022 йил февралгача давр учун бюджетга ушбу йиғимни тўлаган холос. Биз тобора оғирлашиб, мураккаблашиб бораётган иқтисодий аҳвол, икки томонлама дефицит, бюджет интизомининг ишдан чиқиши шароитида ижтимоий нафақалардан тортиб суюнчи пулларигача бўлган харажатларда популизм билан эмас, соғлом ақл билан иш тутишга чақирар эканмиз, нега монополист ва олигархик тузилмалардан имтиёзларни олиб ташлаш йўлидан юрмаслигимиз керак? Узвий бўлишимиз зарур.