Воитовга очиқ хат: Бозор нархлари ҳақида фермерлар озод этилгач, жиддий гапириш мумкин Ҳурматли вазиримиз Воитовнинг Ўзбекистонда пахта нархини эркин бозор белгилашини яна бир бор таъкидлагани хурсанд қилади. Демак ният жиддий. Фақат қарз қилинган хизматкор ва хўжайин, оёғи боғлиқ крепостной ва феодал, ҳақсиз қул ва қулдор ўртасида эркин нарх қандай шаклланишини ҳеч қурса назарий жиҳатдан тушунтириб берилса, кўп саволларга аниқлик киритилган бўларди. Вазиримиз тилга олган эркин бозор фермер пахтасини у боғлаб берилган кластерга сотмаслик ҳуқуқини ҳам кафолатлайдими? Ахир эркин нархда сотмаслик ихтиёри ҳам мавжуд. Вазир тилга олган эркин бозор нархининг фермер умрида кўрмаган ва кўрмайдиган Нью-йорк биржасидаги тола нархидан келиб чиқиб чўтга солинган формулага нима алоқаси бор? Қачондан бошлаб эркин нарх формула билан белгиланадиган бўлди? Ахир фермер тола эмас, хом пахта сотади. Қачон кўргансиз, нефтчилар нефть нархини бензинга боғлаб формула билан сотганини. Сиз чўтга солган, юмшоқ креслода ўтириб ҳисобланган 8 минг сўм пахта нархи эмас. Пахта нархи очиқ бозорда, хусусан сотувчисиям, олувчисиям эркин бўлган биржада аниқланади. Январдаги қарор ҳақида тинимсиз эслатасиз. Лекин январдаги қарорда пахта нархи октябрга келиб, фермер қимматлаштирилган уруғлик, ёқилғи, ўғит, техника хизматидан бўғзигача қарз бўлиб улгурган октябрда нарх белгилансин дейилмаган. Қарорнинг 2- бандини бошқатдан ўқинг! Сизнинг севимли кластерларингиз фермерларга февралда 1 кило пахтани 6500 сўмдан оламан деганда фермерлар пахта экишга киришган бўлишармиди? Тан олинглар, била туриб, фермерларни том маънода алданишига йўл қўйиб бердинглар. Дарвоқе, ўша қарорга кўра 2024 йил ҳосили учун 2023 йил 1 октябргача шартномалар тузилиши керак. Бугун 20 октябрь. Нега бу ҳақда индамайсиз? 2024 йил ҳосили учун нечта кластер нечта фермер билан, қайси нархларда шартнома қилди? Сиздан ҳеч ким субсидия ҳам, имтиёз ҳам сўраётгани йўқ. Дўст-биродар кластерларингизни мажбурланг ҳам дейилаётгани йўқ. Ўзларингиз белгилаган қоидаларга ўзларингиз амал қилинг. Бўлди. Фермерга бундан ортиғи керакмас. Қолганини сиз ният қилиб айтганингиздек эркин бозор ҳал қилиб беради. Отабек Бакиров.