Газ омборларидан қанча газ олинаяпти? Бир ой муқаддам вазиримиз Мирзамаҳмудов Қонунчилик палатасида берган маълумотида газ омборларидан ўтган йили кунига максимум 18 млн.куб газ олингани, бу йил эса шу миқдор 40 млн.кубга етказилганини эълон қилганди (охирги 20 сония). Кеча эълон қилинган интервьюда эса вазиримиз газ омборларидан ўтган йили кунига максимум 28 млн.куб газ олингани, бу йил шу миқдорни 33-34 млн.кубга етказа олишганини таъкидлади (12:00 дақиқадан). Қайси бир маълумот тўғри эканини, вазиримизнинг ўзи яна изоҳ бермагунича тушуниш қийин. Ёки бу маълумотлар берилаётганида улар солиштирилиши мумкинлигини ўйлаб ҳам ўтиришмаган кўринади (қисқа хотира синдромига ишонишган бўлиши мумкин). Агар қурилган янги станциялар ҳисобига омборлардан 40 млн.куб газ олиш мумкин бўлган бўлса, нима учун 12-15 декабрь кунлари мавжуд газзаправкалардан яримидан кўпи ишламади? Ҳа, дарвоқе, интервьюда вазиримиз совуқ кунлари газзаправкалар фаолияти тўхтатилмагани, фақат вақт чеклови киритилганини алоҳида қайд этди. Ваҳоланки вазирликнинг ўзи 1179 та газзаправкадан 547таси ишлаётганини тан олган эди. Ва умуман олганда яхши саволлар берилган интервьюнинг шоҳиқтибоси мана бу: "2024 йилдан энергоресурсларга бўлган ички эҳтиёжни 100 фоиз қоплаш вазифаси қўйилган. Агар буни бажаролмасак, нафақат мен, балки тизимдаги барча масъуллар ишлашга нолойиқмиз". Ўзбекистонликлар интервьюнинг шу қисмини эслаб қолишлари кифоя холос.