Расмий инфляция дори ва хизматлар нархи ҳисобига тезлаша бошлаган Ўтган йили октябрдан кейин бир неча ойлик кетма кет расмий пасайишдан сўнг, йиллик инфляция яна кўтарила бошлаган ва 8,1%ни ташкил этган. Апрелнинг ойлик инфляцияси 0,9%дан ошган. Бунда озиқ-овқатлар 0,4%га, ноозиқ-овқатлар 1,0%га, хизматлар эса 1,8%га қимматлаган. Муҳим озиқ-овқатлардан шакар нархи 3,3%, сут 1,8%, картошка 1,6%, гуруч 0,9%га ошган. 5 ойлик танаффусдан кейин гўшт нархи яна кўтарила бошлаган (+0.4%). Статистикачиларимизга кўра, апрелда бензин 1,8%га, пропан 10,4%га арзонлаган, метан эса 3,1%га қимматлаган. Ҳамманинг чўнтагига ва танасига таъсир ўтказаётган дори ва тиббиёт маҳсулотлари 9,5%га ошган. Хизматлар орасида совуқ сув (+18,0%), иссиқ сув (+12,5%), иситиш (+12,1%), соғлиқни сақлаш (+3,3%), амбулатория ва стационар даволаш (+2,7%) кескин қимматлагани билан эсда қолади. Бугундан кучга кирган энергетик тарифлар ва унинг бошқа товар ва хизматларга ўтказадиган таъсир тўлқинлари ҳисобига, катта эҳтимол, 8%дан паст йиллик инфляцияга энди келаси йилгача бошқа қайтилмайди.