Деталларида иблис яширинган ёмон лойиҳа Яширин иқтисодиётга қарши курашиш бўйича таклиф этилаётган янги нормалар қарор қабул қилувчиларнинг икки турли миноралари томонидан ясалганга ўхшайди. Биринчи минора қандайдир кўринишда бўлса ҳам, ҳатто яширин иқтисодиётга қарши курашда энг муҳим ҳаракатларни тушириб қолдирган бўлса ҳам, яширин иқтисодиёт кўламини торайтиришга туртки берадиган таклифларни илгари сурган. Иккинчи минора эса қулай фурсатдан фойдаланиб, жамоатчиликнинг шоклар таъсирида ўзи билан ўзи овора ва карахт ҳолатида ўтган ва аввалги йиллардаги чекинишлар учун реванш олишга, шу баҳона ўзи бусиз ҳам бизнес устидан катта ваколатларни янада каттайтириб олишга ҳаракат қилгандек. Давлетов кўзқараши билан айтганда, "икки оёқ бир этикка тиқилган пайт қора халқнинг чўнтагига қўл тиқишга уриниш адолатсизликдан бошқа нарса эмас... тадбиркорни, оддий одамларни “ямлаб ютишга” тайёр турган конторага қўшимча ваколат бериб, афсусланиб юргандан кўра ҳозироқ етти марта ўйлаб, бир марта кесган яхши" Жамоатчилик бу "франкенштейн" ҳужжатни ҳали тўлиқ кўргани йўқ, лекин танишиб кўрганларда ўтган йили ноябрдаги казус эсга тушиши аниқ. Эсингизда бўлса, ўтган йили ноябрда Қоидабузар ҳайдовчиларга жарима балларини ёзиш тизимини жорий этиш бўйича қонун лойиҳаси муҳокамаси бошланди. Бир қарашда яхши, узоқ кутилган қонун лойиҳаси. Лекин бу лойиҳага бутунлай бошқа чекловлар — ички ишлар ходимларини фото ва видеотасвирга олиш билан боғлиқ чекловлар қўшиб кетилганлигини орадан бир неча ҳафта ўтгачгина Сенатдаги муҳокамалар вақтида билган эдик. Ҳозир сўрасангиз, мен бу қаердадир осилиб қолган лойиҳани, ҳатто орасида мен маъқуллаган ва истаган қоидалар акс этган бўлса ҳам, ёмон қонун деб атайман. Яширин иқтисодиётга қарши курашиш бўйича комплекс чора-тадбирларни амалга ошириш тўғрисидаги қарор лойиҳаси билан ҳам худди шундай. Бу ёмон лойиҳа, гарчи қатор конструктив қадамларни кўзда тутган бўлса ҳам, чунки унинг орасида, билибми, билмайми, атайинми ё кўр-кўрона равишда яширин иқтисодиётга қарши курашда ёрдам берадиган эмас, эртага одамлар ва ҳимояти йўқ кичик бизнес устида портловчи "миналар" жойлаштирилган. Шунинг учун ҳам бу ёмон лойиҳа. Қабул қилинса, оқибатлари ҳам ёмон бўлади.