Хоҳиш бўлса, Uzauto motors ликвид мошинлар сотишни бир кунда тартибга солса бўлади Cobalt учун 25 минг шартнома тарқатилганининг еттинчи кунига келиб, қанақадир техника мўъжизаси билан контрактацияларни қўлга киритган спекулянт ва ўртамчилар уларнинг номига чиққан шартномаларга пул тўлашга аввалига 500 долларгача сўрашган бўлса, кеча такса 200 доллар, бугун 100 долларгача пасайди (бозорда Cobalt нархи кескин ташлаб юборгани бу кўпроқ автомобиль бозоридаги ҳали давом этадиган чўкиш билан боғлиқ). Эътибор қилсангиз, спекулянт ва ўртамчиларнинг ўзларида тўлагани пул йўқ. Ҳатто 15%ини тўлаб, қолганини автокредит қилишга ҳам. Пули борлариям, илгаригидек тўлов қилиб, автомобиль чиқишини 3-6 ой кутиб, қайта сотиб даромад олишга кўзи етмаяпти. Чунки автомобилнинг қайта сотилиши жараёнида расмийлаштирилиши учун яна камида 400 доллар харажат қилиниши бор. Қўшимчасига, бозор муттасил ташлаяпти, автомобиль салондан чиққунча яна нархлар ташлаши риски анча баланд. Энди ўзингиз соғлом ақлга ўйлаб кўринг, Cobalt олмоқчи ва минмоқчи бўлган росмана харидорнинг, ҳеч бўлмаса қўлида 20 млн.сўм пули бўлиши керакми? Сиз нима деб ўйлайсиз, Savdo.uzavtosanoat.uz сайтига Cobalt олиш учун ҳар дақиқада киришга уринган 100 минг ўзбекистонликнинг қанчасида Cobalt олишга пули бўлган. Шу юз минглар, боринг ана 100 минг одамнинг қанча қисмида Cobalt'нинг 50%и тугул, 15%ини тўлашга пул бўлган? Майли, спекулянтларни қўя турайлик, талабалардан тортиб, уй бекаларигача йилига 3-4 марта ўтказиладиган миллий шармандалик лотореясида иштирок этишга нима ундайди? Балки мана шу бузуқ мотивацияни тийиб, тугиб қўйишдадир ечимлардан бири? Наҳотки, фойдаси потенциал харидорларда эмас, спекулянтлар ва автомобиль сотиб олиш учун эмас, шартномани сотиб пул ишлаш учун иштирок этаётганларга ўтиб кетаётган шарманда лотореяни нормал механизмга айлантириш мумкин эмас? Мумкин, бугунги рақамлашган реалликларда жуда осон, лекин бунинг учун монополистларимизда бунга хоҳиш бўлиши керак. Айтайлик, Контрактация очилишидан 3 кун олдин, котрактацияга қўйиладиган ликвид автомобиллар нархининг 15%ини махсус ҳисобрақамга киритиш талаби орқали минглаб спекулянт ва лотореяда иштирок этишдан мазахўрак ўртамчиларни ўйиндан чиқариб юборса бўлади. Аниқ мисолда тушунтираман. 148 млн.сўмлик Cobalt учун шартнома олмоқчимисан, марҳамат қилиб, Savdo.uzavtosanoat.uz орқали идентификациядан ўтиб, камида 22 млн.сўмни махсус ҳисобрақамга кирит, пул киритилиши билан сенга кейинги босқичга ўтиш учун тасдиқловчи смс келади. Контрактация очилган куни шартнома расмийлаштирилиши билан, 22 млн.сўм шартнома ҳисобига ўтиб кетади. Қолган 57 млн.сўмини 7 кун ичида тўлайсан, бўлди. Тўлай олмасанг, киритилган 22 млн.сўмни 10%и куяди. Шартнома ололмасанг, 22 млн.сўм 3 кун ичида ҳисобингга қайтарилади. Дарвоқе, бугун Cobalt учун олинган шартномаларнинг тўлов муддати тугайди. Банклардан ўтаётган транзакциялар сони кўрсатмоқдаки, агар яқин соатларда мўъжиза рўй бермаса, минглаб Cobalt учун шартномалар куяди. Юмалоқ ёстиқ қилиб ичкарида тақсимлаб олишмаса, балки келаси душанба, балки ҳафта давомида улар яна контракция учун чиқарилиши керак. Сиз нима деб ўйлайсиз, Uzauto motors яна спекулянтлар ва ўртамчилар иштирокида шармандали лоторея ўтказадими ва бу лоторея қачонгача давом этади?