Спекулянтларга истисно берилмаслиги керак Амалдаги оферта шартларига мувофиқ монополист UzautoMotors билан тузилган контрактация 7 календар куни ичида тўланиши керак. 30 декабрдан 2 январгача дам олиш кунлари экани инобатга олинса, эртага 29 декабрь тўловлар учун охирги кун. Лекин тармоқларда бу муддатни узайтиришга чақириқлар ва илтимослар янграмоқда. Тўғриси, нега халқнинг доимий қарғиши остидаги ва коррупцияни рақамлаштиришни уддалаган монополистнинг стратегик шерикларига айланган спекулянтларга адвокатлик қилинаётгани тушунарсиз. Ҳақиқатда автомобиль сотиб олмоқчи бўлган ва шартнома ололган кам сонли росмана харидорларнинг режаси, жамғармаси, тўлов манбаси доим аниқ бўлади. Спекулянтда эса автомобиль сотиб олишга аввалбошдан пул йўқ, чунки у ўз номи билан олиб сотар, ё шартномани кимгадир 1000 долларга пуллайди ё банкка кредит учун чопади. Автомобиль учун тўлов юз бермадими, бўлди, шартнома куйди. Тўлов амалга оширилмагани учун куйган буюртмалар бўйича янгитдан контрактация очилиши зарур. Сўмда пули йўқ, доллар алмаштирилиши зарур, эски машинасини сотиши керак, дея қичқираётган олиб сотарлардан "бечара" яратишга ўрин қолмаслиги керак. Банклар шу кунларда валюта таклифи кескин ошиши муносабати билан тижорий курсларни коридор минимумигача пасайтиришни бошлашса, нур устига аъло нур бўларди.