Газ ва Электр бўйича "ақлли" счетчикларни ўрнатиш ҳалигача якунланмаган Тўғриси, бундан ҳайрон қолмадим. Каррасига қимматлаштирилган газ ва электр счетчикларини ўрнатиш якунланиб қолса, қайта ва қайта ақлли чиқмаган счетчикни бошқа ақллисига алмаштириб, фақат овқат қилиш учун газ ишлатиладиган хонадонларга қиймати ҳеч қачон оқланмаслигини била туриб пул ўзлаштириш ҳам тугаб қоладику. Эслатиб ўтаман, ақлли счетчикларни ўрнатиш электр бўйича 2021 йил якунигача, газ бўйича эса 2021 йил 1 августгача тугалланиши керак бўлган. Каррасига қимматлаштириш орқали триллионлаб қарз маблағлари ўзлаштирилгани учун ҳам, муддатлар атайин чўзилгани ва чўзилаётгани учун ҳам ҳеч ким жазолангани йўқ. Ўрага сичқон тушди, гулдур-гуп. Газетанинг Энергетика вазирлигига таяниб ёзишича, электр энергиясини тижорий ҳисобга олишнинг автоматлаштирилган тизимини (ЭТҲОАТ) жорий этиш бўйича ишлар 98,9 фоизга бажарилгани, газ бўйича эса 2024 йил охиригача якунланиши режалаштирилган. Ишончим комилки, бу муддатда ҳам охирига етказишмайди (Давлат раҳбарига охирига етказамиз дея аввалги йилларда берилган ваъдаларнинг ўзи саноғи йўқ). Қарангки, шонли энергетиклар ўзларининг мажбуриятини муддатида бажара олмагани учун энди қарздор фуқароларни электр ва газдан ўчириш бўйича қонунчиликка ҳам ўзгартириш киритишни уддалашган. Ақлли счетчиклар белгиланган муддатда ўрнатилганида ва улар ростан ҳам ақлли бўлганида бу қонунга зарурият бормиди, деган саволни парламентда беришмаган.