1,2 млрд.доллардан 8 млрд.долларгача Номини ошкор этмаган соҳа мутахассисларининг айтишича, ёнувчи сланец лойиҳасини 2013-2014 йилда Ўзбекнефтгаз бошлаган, ўша йилларда нефть нархи кескин тушиб кетганидан кейин, иқтисодий самарадорлик нуқтаи назаридан бир муддат тўхтатилган экан. Лойиҳа устидаги ишлар 2019 йилда яна тикланган. Йилига 6 млн. тоннагача сланецни қайта ишлаш орқали ундан 400 минг тонна енгил нефт (Бухоро нефтни қайта ишлаш заводида бензин ва керосин олиш учун), 90 тонна нодир металлар (ванадий, вольфрам, олтин, титан, мис ва уран) ажратиб олиш, қолган кулидан 1,5 млн тонна клинкерни Қизилқумцементга сотишни назарда тутган лойиҳанинг умумий қиймати қиймати 1,2 млрд долларга баҳоланган экан. Яна маълум қилишларича, Оқтов, Сангрантов ва Бойсундаги энг йирик сланец майдонлари ёпиқ қарор билан кипрликми, швейцарияликми ё гонконглик инвесторлар бенефициарлиги ва назоратига ўтказилган. Газета 2014 йилда айнан Сангрантов конини ўзлаштириш ва сланецни қайта ишлаш бўйича завод қуришни назардан тутган 1 млрд.долларлик лойиҳа ҳақида Ўзбекнефтегаз вакилига таяниб хабар берган экан. Ўзбекнефтегаздан "Гонконгликлар" ихтиёрига ўтгач, қиймати 8 млрд.долларгача шишган лойиҳа иқтисодий жиҳатдан ўзини қандай оқлаши ва молиялаш манбалари ҳақида маълумот келтирилмаган (бошқа лойиҳалари бўйича ҳам шундай).