​Чиноз нефтни қайта ишлаш заводи ва UNG Petro заправкалари 70 млн.долларга сотил(а)дими)? Давактив "UNG Petro" МЧЖнинг 100% улуши ва “Чиноз нефтни қайта ишлаш заводи” МЧЖ 100% улуши ёпиқ тарзда "хусусийлаштирилгани" бўйича 3 ойдан бери mute режимида қолаётган вақтда ҳукумат қарори билан тасдиқланган инвестиция дастурига Ўзбекнефтегазнинг мазкур икки активини 70 млн.долларга сотиш лойиҳаси қўшилиб қолган. Лойиҳанинг номи атайин алмойи-жалмойи ифодаланган: "Жамият активларини ҳамда нефть конларидаги ускуналарни сотиш ишларини амалга ошириш". Лойиҳа қувватига оид қисмида "Чиноз нефтни қайта ишлаш заводи", автомобиль ёқилғиси қуйиш шаҳобчалари ва нефть конларидаги ускуналарни сотиш дея изоҳ қўшилган. Лойиҳа қиймати 70 млн.доллар. Завод ва заправкалар тушунарли, лекин гап қайси нефть конларидаги ускуналар ҳақида кетаётгани қоронғу. Янаям қизиғи, лойиҳани ҳукумат қарорига қўшишда "UNG Petro" МЧЖ ва “Чиноз нефтни қайта ишлаш заводи” МЧЖ сотилганидан Ўзбекнефтегаздагиларнинг хабари бўлмаганми? Ёки сотиб бўлиб, кейин қилмишларини легитимлаштириш учун қарорга қўшишганми? Ёпиқ хусусийлаштиришдаги сукунат ва ҳатто давактивдагиларни қувиб юриб ҳам жавоб олиб бўлмагач, Газета «Ўзбекнефтгаз» ёқилғи қуйиш шохобчаларининг нархи камида 100 миллион долларни ташкил қилиши (ер нархидан ташқари) мумкинлигини ёзганди. Қизиғи шундаги, 2024 йилнинг биринчи чораги бўйича инвестиция дастурида ҳар бирининг қиймати 1,25 млн.долардан, 2,5 млн.долларлик 2та АЁҚШ қуриш лойиҳаси ҳам бор эди. Бу лойиҳа иккинчи чоракдаги дастурдан тушириб қолдирилган. Норасмий манбаларга кўра (Давактив ва Ўзбекнефтегаз сукунатидан кейин бошқа чора йўқ), 80та заправкадан иборат UNG Petro тармоғи 50 млн.долларга, яъни эҳтимолий нархидан 2 баробар кам нархга сотилган. Шонли энергетикларимизнинг бизнес моделини энди тушунган бўлсангиз керак: 1,25 млн.доллардан заправка қуриш ва 625 минг доллардан сотиш. Ажойиб, шундай эмасми?