Ўзбекнефтегазнинг "аҳволи яхшиланиши" учун яна газ тарифлари ошиши керак S&P Global агентлиги Ўзбекнефтегазнинг охирги евробондлари бўйича шарҳида тақдим этилган рейтингни учта ўзаро баҳсли ва ўзбекистонликлар манфаатларига тескари омил билан боғлаган: Биринчидан, рейтинг агентлиги Ўзбекнефтегаз банкрот бўлса, ҳукумат ёрдамга келишига ишонмоқда (Давлат компаниялари ва давлат банкларининг юқори хатарли, самарасиз ва зараркунанда фаолиятига қарамай, халқаро рейтинг компаниялари ўзлари тўқиган шу сафсатага бошқаларни ҳам ишонтиришга уриниб келишади). 2017 йилдан буён Ўзбекнефтегазнинг юзлаб конлари, заводлари, улушлари, омборлари яширин ва ёпиқ қарорлар билан бегоналаштирилиб, хусусий чўнтакларга совға қилиб келинганини наҳотки S&P Global билмаса. Наҳотки, 8 йилдан бери активлари ўнгидан, чапидан, остидан, устидан узилиб, кичрайтирилиб, қарзлари эса шиширилиб келинаётган монополистнинг якуни қандай бўлишини ва мақсад ўзи шу эканини агентлик кўрмаётган бўлса? Иккинчидан, Ўзбекнефтегаз EBITDA ва леверажи яхшиланиши учун, яъни халқ тилига ўгирганда, тушуми ошиб, бўғзигача етган қарзларини қайтара олиши учун газ тарифлари оширилишда давом эттирилиши керак. Қип-қизил неоколониал цинизмни кўраяпсизми? Яъни Ўзбекнефтегаз қанчалик самарасиз бўлмасин, ғарб инвесторлари ва кредиторлари унинг бондларидан 8,75%дан даромад олишда давом этиши учун биз ўзбекистонликлар товон тўлашда давом этишимиз керак. Учинчидан, GTL заводнинг ишлаб чиқариш қувватлари ошиши рейтинг қувватловчиси бўлиши лозим. Ўзбекнефтегазнинг 40% қарзи нархи 4 млрд.долларгача шиширилган GTL заводга оидлиги англаган рейтинг агентлигига GTL завод сотувга қўйилганини айтишмаганми? GTL заводни "Хусусийлаштиришса" сиз умид қилаётган EBITDA ва левераж қандай ўсади? Охирги 3 йилдан бери тўтиқушдай такрорлаб келаётган шаблонларингиз энди нима бўлади? Инвестор ва кредиторларга яна қандай янги асос келтирасиз?