Текин метро йўқ ва бу аслида ўта қиммат популизм Муҳримбойнинг чиқишларига камдан-кам қарши чиқаман. Масалан, Муҳримбойга текин метро ҳақидаги чиқишига ажойиб эмас, дейман. Ҳар сафар Тошкент метрополитени шундай гўёки халқпарвар акция эълон қилганида, билингки, бюджетдан каррасига ортиғи билан суғуриб олади. Яьни текин метро йўқ аслида. Метронинг ҳар бир текин куни камида битта боғчанинг пули совурилди дегани. 2025 йилнинг дастлабки уч ойида Тошкент метрополитени бюджетдан 183 млрд.сўм субсидия олган. Бу ўтган йилнинг шу давридагидан 2 карра кўп. Тасаввур қилишингиз учун, 2024 йилда метро кунига 1 млрд.субсидия олган бўлса, бу йил кунига 2 млрд.сўмдан кўпроқ субсидия олмоқда. Бошқача айтганда, метронинг “ясалаётган зарари” бир йил ичида 2 карра ошган. Кечаги популистик акциядан кейин бюджетдан сўраладиган субсидия янада кўпайиши аниқ. Ва бунинг товонини нафақат тошкентликлар, бутун Ўзбекистон ортиғи билан солиқлар орқали тўлайди. Шундай экан, пойтахт метрополитенининг вазифаси текин метро томошасини уюштириш эмас. Тошкент метрополитенининг иши поездлар интервалини қисқартириш, барча ёпиқ қолаётган чиқишларни ишга тушириш, кондиционерлар ишлашини таъминлаш, станцияларда туалетларни ишлатиш, имконияти чекланганларнинг чиқиши ва тушишига шароит яратиш, фақат санкция остидаги шимол моховларига қарам бўлмай, Корея, Чехия, Германия каби давлатлар иштирокида, очиқ тендерлар орқали составлар сотиб олиш ва ҳеч қурса, вагонларда ўзбек байроғи устига миндириб қўйилган моховларнинг триколорини олиб ташлаш ва ўзбекча огоҳлантиришларни энг аввал ёзиш бўлиши керак.