​HUMO 2024 йилда "хусусийлаштирилган" Фискал стратегия маълумотларида HUMO тўлов тизими 2024 йилда хусусийлаштирилган корхоналар рўйхатида келтирилган. HUMO'нинг "хусусийлаштирилиши" ҳақида Давактив 2025 йил 13 январда баёнот берган бўлсада (Ўзбекнефтегаз заправкалар тармоғидан тортиб Paynet'гача бошқа йирик активлар яширинча хусусийлаштирилиши бўйича ҳалигача расмий ахборот йўқ), тўлов тизими "эгасини топгани" ишоралари анча аввал, 2024 йил куздаёқ яққол кўринганди. Мана энди буни Иқтисодиёт ва молия вазирлиги ҳам тасдиқламоқда. Иқтисодиёт ва молия вазирлиги шунингдек, HUMO тўлов тизимининг давлатга тегишли 200 млрд.сўмлик дивидендлари ечилмай, янги "хўжайинига" совға қилингани масаласига ҳам тўхталмаган. Яна бир қизиқ маълумот, ўзбекча хусусийлаштириш асл башарасини ошкор қилади. 2024 йилда 17,4 трлн.сўмлик активлар хусусийлаштирилган бўлса, шунинг 5,4 трлн.сўмлик тўлови бюджетга етиб бориб тушган. Бу "хусусийлаштирилаётган" активларнинг катта қисми, айниқса йирик активлар садоқатли "инвесторларга" сопини ўзидан чиқариш, яъни бўлиб тўлаш шаклида берилаётганини кўрсатади (тарифларини кескин оширган HUMO ҳам шу усулда "хусусийлаштирилган").