"Пенсия ислоҳоти" фақат ёш оширишни назарда тутадими? Spot'нинг Пенсия жамғармаси ижрочи директори Муродбек Атаджановга таяниб маълум қилишича, Пенсия ислоҳоти лойиҳасида пенсияга чиқишнинг энг кам ёшини ошириш кўзда тутилмоқда. Бунда пенсия ёши эркаклар учун — ҳозирги 60 ёшдан 63 ёшгача, аёллар учун — 55 ёшдан 58 ёшгача оширилади. Жараён босқичма-босқич юз беради — пенсия ёши ҳар йили ярим йилга кўтарилади. Муродбек Атаджановга кўра, дунёнинг кўплаб мамлакатларида энг кам пенсия ёши 65 ёшдан ортиқни ташкил этади. Ўзбекистонда “Фуқароларнинг давлат пенсия таъминоти тўғрисида"ги Қонун қабул қилинганидан буён 32 йил давомида пенсия ёши оширилмаган. “Фақат Ўзбекистон қолди, бошқа давлатлар эса пенсия ёшини аллақачон ошириб бўлган”, — деган у. Шунингдек, у Ўзбекистонда умр кўриш давомийлиги ўсиб бораётганини таъкидлаган. Айтилишича, бугунги кунда бу кўрсаткич 75 ёшга етган (аслида 2019 йилдаёқ етган, лекин у пайтда қайтанга пенсия тизими янада консервациялашган). Қизиқ тарафи, Муродбек Атаджанов Пенсия ёшини оширишга ундаётган асосий сабаб - Пенсия жамғармасининг улкан ва ошиб бораётган дефицити ҳақида ҳеч нарса демаган. 2020 йилгача алоҳидалашган ва автоном жараёнда ишлаган, кейин бюджет тизимига тўлиқ қўшиб юборилган Пенсия жамғармасининг дефицити тинимсиз ошиб бормоқда. Ўтган йили муаммо расмийлар тарафидан ҳам тан олинган. Энергетика ислоҳотлари, антиислоҳотга айланиб, фақат нарх ошишига олиб келгани, аввалбошда режалаштирилган бирон таркибий ва сифати ўзгариши юз бермагани ортидан, "ислоҳот" деса ўзбекистонликларнинг кўнгли айнийдиган бўлган. Шу маънода Пенсия ислоҳотига нисбатан тушуниш эмас, "яна алдашади" қабилидаги ижтимоий қўрқув бор. Бунинг устига, Пенсия ислоҳотининг ёш оширишдан бўлак маъно-мундарижаси тўлиқ очилаётгани йўқ (катта эҳтимолки, шу умумий қозон тизими яна сақланиб қолади, ёшдан бошқа ҳеч нарса ўзгармайди). Бу якунда ўзбекистонликларга нима беради? Бўлажак пенсионерларга натижалар кафолатланади? Билмаймиз. Ҳа, 2023 йилги сайлов жараёнларидаям, 2024 йилги сайловларда ҳам номзод ва партиялар тарафидан бирон марта Пенсия ёшини ошириш кампания кун тартибига олиб чиқилмаган, яъни сайловчиларга муаммони очиқ айтиб мандат олинмаган.