Лоукостерлар остонамизда, фақат Ўзбекистонга киритилмай турипти Элчилар ва тадбиркорлар билан учрашувда Ўзбекистонга авиақатновлар ҳаддан зиёд қимматлиги ва лоукостерлар йўқлиги мавзуси бир неча марта кўтарилган. Хусусан,Ўзбекистонга парвозлар нисбатан қимматга — 700−900 долларга тушаётганидан шикоят қилган тадбиркорнинг саволига жавобан Бош вазир ўринбосари Жамшид Ходжаев нархларни пасайтириш учун лоукостерларни жалб қилиш кераклигини айтган (44:00 дақиқадан кўринг). Шунингдек, учрашув давомида Ироқлик тадбиркорларнинг Ўзбекистонга келиб-кетишини ташкил этиш хусусий авиакомпания орқали ҳавошкадан 2 карра арзон тушгани эсланган, Покистондаги элчимиз Карачига тўғридан-тўғри рейс йўқлигидан нолиган. Ходжаев ҳавошкага масала қўйилса, доим "паритет бўлса" деб бошлашини, ҳамма элчилар авиарейслар йўқлигидан шикоят қилишини эслатган. Афсуски, Транспорт вазирлигидан ушбу учрашувга ҳеч ким бормаган экан (ўзи Ўзбекистонга Транспорт вазирлиги нима учун керак, фақат монополистлар манфаатини ифода этиш учунми?). Ва яна афсуски, Бош вазир ўринбосари Ходжаевга шу ерда кимдир айтмади, лоукостерлар шунча йиллардан бери Ўзбекистонга киролмай туришини ва улар иложсизликдан Ўш ва Чимкент шаҳарларидан қўним топганини. P.S. учрашувнинг иккинчи яримига транспорт вазири биринчи ўринбосари Маманбий Омаров келган дейилмоқда (2:30:30 дақиқада).