​Янги панжара қироли пайдо бўлдими? Тошкент шаҳрининг Бобур кўчасида темир тўсиқлар қайтадан ўрнатила бошланганига ҳайрон бўлиб улгурмасимиздан, бу кампания энди шаҳарнинг бошқа марказий кўчаларини ҳам қамрай бошлаган. Газета 2017−2018 йилларда шаҳар маъмурияти ва ЙҲХБ ҳайдовчиларга ҳам, пиёдаларга ҳам халал бериб, кўринишни чеклашини расман тан олган ҳолда олиб ташланган темир панжаралар яна қайта ўрнатила бошлагани ҳолатини ўрганган. Ўшанда, 8 йил аввал темир тўсиқлар қанчага тушгани (кейин қаёққа даф қилингани), қанча қурбонларга олиб келгани ҳақида маълумотга эга бўлмагандик. Ҳозир эса билганимиз - шаҳар маъмурияти темир панжаралар ўрнатиш учун 6,9 млрд сўмдан ортиқ маблағ ажратгани.