Ошди-ошди мавсуми: “HUMO SMS-xabarnomasi” икки карра қимматлайди Ўтган ҳафтада Humo карталари бўйича операциялар ва қолдиқни тасдиқловчи СМС хабарномалар нархи 1 майдан бирданига 2 карра, 84,2 сўмдан 168,4 сўмгача қимматлаши маълум бўлди. Бу ҳақда “HUMO SMS-xabarnoma” хизматини кўрсатувчи “Octotelecom” маълум қилган (аввал бу хизматни INFO ZONE МЧЖ кўрсатарди). Нақдсиз тўловлар кенгайгани сайин телефон рақамингизга солган пулларингизни кираётган СМС хабарномалар еб қўяётганини сезган бўлсангиз керак (бир қарасангиз телефонга кеча солган пулингиз тугаб қолган бўлади). Кутилганидек, энди HUMO'дан келадиган СМСлар учун ҳисобингиздан янаям кўпроқ, икки карра кўпроқ пул ейилади. Spot Корхона ва ташкилотларнинг ягона давлат реестрида HUMO СМСларини тарқатувчи ва унинг “отаси” ҳақидаги маълумотларни топа олмагани — тизимда солиқ тўловчининг идентификация рақами (СТИР) нотўғри киритилганлиги ҳақида хатолик чиқаётганига эътибор қаратган. Биринчи мартами? Дарвоқе, нақдсиз тўловларга ўтиш амалиёти тобора истеъмолчилардан пул ундириш воситасига айланиб бормоқдаки (худди антиреформага айланган энергореформа сингари), нақдсизликнинг афзалликлари ҳақида гапиришгаям одам энди истиҳола қилади.