Ширмонбулоқ тошқини такрорланмайдими? Энергетика вазирининг биринчи ўринбосари Умид Мамадаминов кичик ва микро ГЭСлар қуриш учун каналларда сув оқимини, хусусан, уларга гидротехник ўзгартиришлар киритиб, босим ҳосил қилишга рухсат берилиши ҳақида маълум қилмоқда. Албатта, бу борада асосий қарор тадбиркорлар ва пудратчилар ташаббуси билан эмас, лойиҳа институтлари ва буюртмачилар томонидан қабул қилиниши керак. Хатарлар ва оқибатлар ҳам энг аввало уларнинг зиммасига юкланиши зарур. Ҳар бир хатонинг фамилияси, исми ва шарифи бўлиши даркор. Бундан бир ярим йил аввал Ширмонбулоқда қурилаётган кичик ГЭСда юз берган авариядан қандай жиддий хулосалар чиқарилди, жўяли фикр айтиш қийин. Ҳодисанинг оқибати гўёки жабрдийда аҳолига пул бериш ва компенсация тарқатиш билан ёпилди. Лекин 16,3 миллион евролик “Жанубий Фарғона каналида ЖФК-3 кичик ГЭС қурилиши” лойиҳаси бўйича юз берган аварияда ким айбдор бўлгани (жиноий иш очилганми), кимлар жазолангани, хато қаерда кетгани (лойиҳадами, экспертизадами ё ижродами) бўйича ҳалигача бирон расмий маълумот берилгани йўқ. Ўшанда аҳолига етказилган миллиардлаб зиён ва зарарлар давлат чўнтагидан қопланди, лекин кейин кимдан ундирилди? Ё ёпиқлиқ қозон ёпиқлигича қолиб кетавердими? Ўзбекгидроэнерго ўшанда каналга “лойиҳавий сув ўтказиш қобилиятидан кўп сув келгани” (атига +10 м3) аварияга сабаб бўлганини айтганидан кейин тахнологик талаблар ва стандартлар ўзгардими? Масалан, ҳеч қурса аҳоли яшайдиган ҳудудларга нисбатан? Ҳеч қурса, сув оқими мавсумий равишда каррасига ўзгарадиган сув ҳавзаларига нисбатан? Ё "қўшимча сув босимини ҳосил қилиш учун канал, дарё ва ўзанлар конструкциясига ўзгартириш киритишга рухсат берилади" деган вазифа сўзсиз ижрога қабул қилинадими?