Янги даврда миллат ва мамлакат бошига тушган қурт сингари болалатилган идоралардан бири халқ тилида "Қорамол вазирлиги" деб аталувчи Ветеринария ва чорвачиликни ривожлантириш давлат қўмитасидир. 2021 йил бюджетида "Қорамол" вазирлиги"га солиқ тўловчиларнинг 274,1 млрд. сўм маблағи ажратилган. 274,1 млрд.сўм камлик қилган чоғи чорвачилик йўналишидаги фермерларнинг йиллик умумий даромадидан 0,5 фоизи миқдорида йиғим ундиришни исташмоқда. Ахир бу паразитлик-ку, дейишингиз мумкин. Йўқ, бу қароқчилик. Ўрта асрларда қироллар итоат ва садоқат эвазига феодалларига қайсидир ҳудудни ёки соҳани шундоқ тортиқ қилган. Ўша феодаллар тортиқ этилган ҳудудни исталганча талаши, зўрлаши, хўрлаши мумкин бўлган. "Қорамол вазирлиги"нинг ўша ўрта аср феодалларидан қандай фарқи бор? Дарвоқе, Монополияга қарши курашиш қўмитаси "Қорамол вазирлиги"нинг бу очофат иштаҳаларига қарши ўз эътирозларини билдирган.