Мижозлар билан муносабатларни бошқариш тизимига ўтаётган компания мижозлар билан ишлашни тўхтатиб қўйгани ҳақида UzAutoMotors ишлаб чиқараётган Spark, Nexia, Cobalt ва Lacetti учун шартномалар тузиш тўхтатилганига 12 кун бўлди. Расмий сабаб компания дилерларининг SAP S/4 HANA платформасининг ERP/CRM тизимига ўтказилаётгани деб кўрсатилган. Янги тизимга ўтиш қачон якунланиши эълон қилинмаган. Қизиғи, DAMAS/Labo автомашиналари ва хориждан бож тўламай олиб келиб сотилаётган автомашиналар учун шартномалар тарқатиш тўхтамаган. Ўзбекистонда CRM тизимини жорий қилган компаниялар ўндан зиёд, лекин уларнинг биронтаси бу даврда ишлаб чиқариш, сотиш ёки хизмат кўрсатиш жараёнини тўхтатиб қўймаган. Бу қандай компания-ки, бизнес жараёнлар ва ахборот тизими янгиланиши сабабли ҳам сотувларни тўхтатиб қўйса, дерсиз. Ахир сотувлар тўхтаб турса, ўзига зиён бўладику. Лекин UzAutoMotors'га мумкин, уларга бўлаверади. Монополистга нима бўпти? Қайтанга янаям яхши бўлади, пайдо қилинаётган сунъий дефицит туфайли эртага "ишлар во бўлади". Дарвоқе, CRM нима дегани ўзи? Customer Relationship Management - мижозлар билан муносабатларни бошқариш тизими. Тизим воситасида мижозлар билан муносабатлар занжири автоматлаштириш орқали мақбуллаштирилади ва бу сотувлар ҳажмини оширади. Қонунларга, солиқларга кўндаланг қўйиб қўйган UzAutoMotors CRM тизимига ўта туриб мижозлар билан ишлашни тўхтатиб қўйган биринчи компания сифатида тарихда қолса не ажаб?! @the_bankiroff