Ўзбек чиновниклари импорт автомашиналар - Trailblazer, Equinox, Malibu, Skoda Kodiaq, Škoda Octavia, Kia K5ларни сотиб олишда давом этишлари мумкин Халққа раво кўрилганини ўзларига раво кўрмаслик давом этади. Ўзбек чиновникларини ўзимизда чиққан Нексия, Кобальт ва Ласеттига автомашиналарга ўтказиш орзулари, афсуски, орзулигича қоладиган бўлди. Вазирлар ва ҳокимлар қиймати БҲМнинг 2000 баравари (490 млн сўм)гача бўлган автомашиналарни сотиб олишда давом этишлари мумкин. Базавий ҳисоб миқдори ошганда бу қиймат ошаверади. Қаранг, қандай қулай. Ўзларига келганда ўзбек чиновниклари ҳеч нимани аяшмайди ва унутишмайди. Қонунларимизга зид равишда, махфий протоколлар билан, бож тўламасдан импорт қилиниб, чайқовчилик йўли билан олиб келиб сотилаётган Trailblazer, Equinox, Malibu, Skoda Kodiaq, Škoda Octavia, Kia K5 ларни мазза қилиб олишда давом этаверишади ўзбек чиновниклари. Халққа эса 6-9 ой кутиб олинадиган Нексия-3 ҳам бўлаверади Дарвоқе, давлат харидлари учун тақиқланган импорт товарлар рўйхатида енгил автомобиллар ҳам бор. Унда қандай қилиб ўзбек чиновниклари импорт қилинган Trailblazer, Equinox, Malibu, Skoda Kodiaq, Škoda Octavia, Kia K5ларни сотиб олишмоқда дерсиз? Чунки двигатель ҳажми 1500-3000 см3дан ортиқ бўлган бу машиналар тақиққа туширилмаган. Тақиққа эса фақат мотор хажми 1500 см3гача бўлган автомобилларни қўшишган. Ўзбек чиновниклари аҳмоқ эмаску, ўзларига ўзлари тақиқ ва чеклов қўядиган. Ахир янги тамғали Ўзбекистонда чеклов ва тақиқлар қора халққа, ҳатто автомашинаси номери қора халқ билан бир хил бўлишдан ор қиладиганлар учун эса эшиклар-у, тешиклар ланг очиқ.