Артикходжаев ва пеня Артикходжаев жаноблари олти ой мобайнида мол-мулкдан фойдаланилмаган ёки ижарага берилмаган тақдирда пеня ҳисоблашни таклиф этипти. Ҳайронман, нега олти ой? Нега бир ойдан кейиноқ пеня ҳисоблаш мумкин эмас? Нега фақат нотурар-жойларга? Балки бўш турган квартира ва ҳовли-жойларга ҳам пеня қўллаш керакдир? Минилмай гаражда ётган автомашиналарга-чи? Улардан ҳам фойдаланилмаяпти. Пеня ундиришни ўйлаб кўринг, жаноб Артикходжаев. Муболаға ўз йўлига. Лекин жаноб Артикходжаев ер тарқатиш ва бизнесига имтиёз ундириш ва кенгайтиришдан бўш қолган вақтларида балки қонунчилигимизни ҳам бир ўрганиб кўрар? Жаноб Артикходжаев қонунларимизда мулкдор ўз мулкини ўз истаганича тасарруф этишини биладими? Истаса ижарага беради, нархи тўғри келмаса қулф осиб қўяди, истаса сотади. Қонуларимизда ҳарқалай шунақа жаноб Артикходжаев. Пойтахтдаги минглаб тадбиркорлар мулкларини пешона териси билан топган. Текинга, ноль қийматда ё имтиёз билан олмаган айрим кабинетларни тепиб кирадиган корчалонларга ўхшаб. Жаноб Артикходжаев мулк эгалари мулк солиғи ва ер солиғи тўлашидан хабари бўлса керак. Давлатнинг ҳақи фақат мана шу тўлов. Солиқ тўловлари вақтида тўланмасагина, пеня ундирилиши мумкин. Солиқ кодексининг 110- моддасини очиб, ўқиб олинг. Пеня аслида нималиги ёзилган. Жаноб Артикходжаев, бу кетишда Тошкент шаҳрида сиз ва сизнинг шотирларингиздан бошқа тадбиркор қолмайди. Ё қочиб қутулади ё сотиб. Келадиганиям фақат сиз билан келишмагунча кўкармайди. Балки сиз шуни истаётгандирсиз?