Ҳал қилувчи палла бошланмоқда Кечадан бошлаб Ташаббусли бюджетлаштириш жараёнида фуқаролар томонидан билдирилган таклифлар бўйича овоз бериш жараёни бошланди. Овоз бериш 20 кун давом этади. Шу 20 кун давомида ҳар куни ўзимга маъқул келган ташаббуслар билан бўлишиб боришга аҳд қилдим. Демак биринчиси: "Оқтепа круг мостларига лифт" Тошкент шаҳрининг Шайхонтоҳур ва Чилонзор туманларини боғловчи Оқтепа майдонидаги транспорт тугуни 7 та кўча, жумладан Лутфий, Муқимий, Самарқанд дарвоза ва Нурафшон кўчаларини бирлаштириб туради, унинг қурилиши Ўзбекистон Темир Йўллари АЖ томонидан 2016 йил август ойида ниҳоясига етказилган. Лутфий ва Муқимий кўчаларининг Оқтепа майдонига қўшилиш қисмида пиёдалар учун Себзор ва Абдулла Қодирий ёки Бунёдкор ва Муқимий, ёхуд Бунёдкор ва Чўпонота кўчалари кесишмасидаги каби иккита ер усти ўтиш жойи қурилган, аммо катта фарқи шундаки, Оқтепа майдонидаги пиёдалар эстакадаларида на эскалатор, на лифт мавжуд. Иш нега чала ташлаб кетилган, номаълум. Чақалоғини тоза ҳаво олиши учун Байналминал кўчаси бўйлаб ташкил қилинган аллеяга олиб бормоқчи бўлган Чилонзор тумани 7 даҳа аҳолиси болалар аравачасини уйда қолдириши керак. Кекса ёшлилар эса зиналардан чиқиб-тушиш ёки камида 300 метр узоқликдаги ва автомобил қатнови жуда юқори бўлган ҳудуддаги ер усти йўлига бориб, йўлни кесиб ўтиш танлови қаршисида қолишади. Бундан ташқари, пиёдалар ўтиши учун мўлжалланган иккала кўприкда ҳам эскалатор ўрнатишга жой йўқ. Аммо, 3 ва 4 расмларда лифт ўрни мавжудлиги, аммо лифт қўйилмаганини кўриш мумкин. Ногиронлиги бўлган шахслар, болалар аравачалари билан ҳаракатланаётганлар ёки оғир юкни кўтариб бораётган катта ёшлилар учун лифт керак. Рўйхатдан ўтинг ва овоз беринг!