​Сенаторлар ҳар куни лаънатланадиган ер усти "кўприклари" билан боғлиқ асосий эътироз нимада эканини ҳалиям тушунишмаган кўринади: Бундай кўприклар бўлмаслиги керак! Сенатнинг бугунги мажлисида (35-минутдан бошлаб кўринг) Тошкент шаҳридаги ер усти ўтиш йўлакларидаги мавжуд лифт ва эскалаторлар эрталаб 8:00дан кеч 20:00га қадар ишлаётгани айтилди (8та лифт ва 8та эскалатор). Пойтахт аҳли ва меҳмонлар бу баёнотни қанчалик тўғри эканини текшириб кўришлари мумкин. Сенат тегишли қўмитасининг маълум қилишича, лифт ва эскалаторларнинг ишламай ўчиб қолишига пиёдаларнинг ўзлари сабабчи экан (ўқувчи ва ёшларнинг ташвиш тугмасини босиб қўйишлари ортидан шу ўчишлар рўй бераётгани ва кейин махсус калит билан очилиши кераклиги айтилди). Лифт ва эскалаторлар умуман мавжуд бўлмаган Муқумий, Руставели ва Лутфий кўчаларидаги ўтиш йўлаклари бўйича Тошкент шаҳар кенгашининг тегишли қарори чиқмаган (молиялаштиришда муаммо бор эмиш). Эътиборлиси, на бирон сенатор, на йиғилишга таклиф этилган шаҳар ҳокими ўринбосари бу ер усти ўтиш йўлаклари пиёдалар учун жабр, зулм ва зўрлик экани ҳақида лом-лим дейишгани йўқ. Эҳтимолки, уларнинг ҳеч бири бу йўлаклардан ўтиб кўрмаган, шунинг учун пиёдаларнинг асосий эътирози нимада эканини уларга етиб бормаган (халқ ва чиновниклар ўртасидаги узилиш нимада деб кўрсатишга яққол мисол). Дарвоқе, сенаторлар ер усти ўтиш йўлакларининг бузуқ ёки ўзи йўқ лифт ва эскалаторларини ишлата олгунига қадар, сайланмаган шаҳар ҳокими яна 107 млрд.сўмга 20та шунақа "кўприк" қурмоқчи. Бу қарорнинг пул ўзлаштириш мақсадлари ўз йўлига, шу кунгача ҳокимиятдан тортиб сенатгача бўлган пиллапояларда биронта ўзбек чиновниги ер усти кўприкларининг шаҳар аҳли учун қанчалик зиёнли эканини ҳаёлига ҳам келтириб кўришаётгани йўқ. Бу мавзудаги мутахасисларнинг чиқишлари, репортажлар, кўр кўзлар ҳам кўриши керак бўлган тажрибалар кор қилгани йўқ. Шунинг учун мен таклиф қиламанки, Танзила опа ёнига Раматов, Маҳкамов ва албатта ҳокимтўра Умрзаков жанобларини олиб, бирини аравачага ўтказиб, яна бирини қўлига болалар коляскаси бериб, яна биттасининг қўлига иккита сумка ё бола тутқазиб, кунига икки маҳал шу лаънати кўприклардан олиб ўтишлари керак. Бу ишни ҳар куни қилиш керак. Токи бу ерда асосий муаммо нимада экани уларнинг ўзгача зеҳниятларига етиб бормагунгача.