​"Норматив-ҳуқуқий ҳужжатлар лойиҳалари жамоатчилик муҳокамасига жойлаштирилиши шартлиги ҳақида талаб мавжуд эмас" Адлия вазирлиги норматив-ҳуқуқий ҳужжатлар лойиҳаларининг жамоатчилик муҳокамаси масаласида ўзининг позициясини очиқлаган. Вазирликка кўра, “Норматив-ҳуқуқий ҳужжатлар тўғрисида”ги Қонунда ишлаб чиқувчи томонидан норматив-ҳуқуқий ҳужжатларнинг лойиҳалари regulation.gov.uz порталида жамоатчилик муҳокамасини ўтказиш учун қонунчиликда белгиланган тартибда жойлаштирилиши назарда тутилганлиги норматив-ҳуқуқий ҳужжатлар лойиҳалари жамоатчилик муҳокамасига жойлаштирилиши шартлигини англатмайди. Бошқача айтганда, бизнингча, "қонунчиликда белгиланган тартибда" обороти бундай мажбуриятни танлама асосда четлаб ўтишга имкон беради. Шунингдек, вазирлик қандай ҳужжатлар жамоатчилик муҳокамасидан ўтказилмаслиги ҳолати 15.03.2021 йилдаги 5025-сон қарорда белгиланганлигига эътибор қаратган. Демак, қуйидаги ҳолларда лойиҳалар жамоатчилик муҳокамасидан ўтказилмайди: – фавқулодда вазиятларнинг олдини олиш ёки уларнинг оқибатларини бартараф этиш, юқумли ва паразитар касалликлар тарқалишининг олдини олиш бўйича чекловчи тадбирларни белгилашга қаратилган лойиҳалар; – янги қабул қилинган қонунчилик ҳужжатларининг талабларига мувофиқлаштиришга қаратилган ўзгартириш ва қўшимчаларни назарда тутувчи лойиҳалар; – тадбиркорлик фаолиятига, фуқароларнинг ҳуқуқлари, эркинликлари ва қонуний манфаатларига ҳамда атроф-муҳитга таъсир кўрсатишни назарда тутмайдиган лойиҳалар. Вазирлик шунингдек, ўз позициясини ҳимоялаш учун жамоатчилик муҳокамасига манзилли ёндашув (аслида танлама ёндашув) хорижий давлатлар амалиётида қўлланилишига эътибор қаратган. Шундай намуна ўлароқ Россия ва Беларусь тажрибаси келтирилган (no comment). Шимолий Корея мисоли намуна келтирилмаганига ҳам раҳмат.