Яна бир йўқотганимиз - Жамоатчилик муҳокамаси Эркинликлар ва ҳуқуқлар бир кунда ва бирданига йўқотилмайди. Очиқлик ўрнини ёпиқлик бир кунда эгалламайди. Ҳаммаси аста-секин, бирдан қаттиқ оғриқ яратмасдан амалга оширилади. Худди қурбақани қозонда қайнатиш каби юз беради бу. Масалан, "барча норматив-ҳуқуқий ҳужжатлар лойиҳалари лойиҳани ишлаб чиқувчи ташкилотлар томонидан Норматив-ҳуқуқий ҳужжатлар лойиҳалари муҳокамаси порталига (regulation.gov.uz) жамоатчилик муҳокамаси ўтказилиши учун жойлаштирилиши лозим"лиги белгилаб қўйилган норма бекор қилинганига бир йилдан ошди. Ўзбек чиновниклари ўзларига қулай бўлиши учун "Муҳим иқтисодий ва ижтимоий-сиёсий аҳамиятга эга норматив-ҳуқуқий ҳужжатлар лойиҳалари, қоида тариқасида, лойиҳани ишлаб чиқувчи ташкилотлар томонидан Норматив-ҳуқуқий ҳужжатлар лойиҳалари муҳокамаси порталига (regulation.gov.uz) жамоатчилик муҳокамаси ўтказилиши учун жойлаштирилиши лозим" дея иккита ибора қўшиш билан жамоатчилик мухокамаси мажбуриятини буткул йўққа чиқара олишди. Энди жамоатчилик назорати ва бошвоғини йўқотган чиновниклар истаса, лойиҳаларни муҳокамага қўяди, истамаса қўймайди. Абсурд шу даражага етдики, жамоатчилик муҳокамасига бир матн чиқарилиб, амалда бошқа бир матн қабул қилина бошланди. Бу ҳақда сўз очсанг, очиқча хафа бўлиш ва масалани кўтарганни душман санаш қоидага кирди. Жамоатчилик муҳокамаси мажбурияти бекор бўлгандан бир йил ўтиб қабул қилинаетган ҳужжатларнинг ҳатто 10 фоизи ҳам муҳокама илдизларига эга эмас даражага етилди. Regularion.gov.uz галочка учун, балки қанақадир аҳамиятсиз, балки умуман қабул қилинмайдиган ҳужжатлар номига жойлаштириладиган порталга айланди. Шунчаки ўзингиз учун солиштириб кўрсангиз бўлади, lex.uz ва e-qaror платформасида эълон қилинган ҳужжатларнинг илдизини regulation gov.uz'да қидириб кўринг. Балки берилган нарса бир кун келиб яна қайтариб олинади, деган ақида тўғридир.