​​Янги, лекин хиралаштирилган Ўзбекистон Газета Давлат раҳбари учун тақдимот слайдлари хиралаштирилаётганига эътибор қаратмоқда. Менимча, бундан ҳайрон бўлмаслик керак. Маълумотларни блурлаш, яъни хиралаштириш аллақачон бошланган ёпиқлик ва махфийлик сиёсатига жудаям мос келади. Мана, қуйидаги суратда Ўзавтосаноат электромобиллар бўйича тақдимот ўтказаяпти. Рақамлар аниқ тиниқ кўрсатилса, кимдир ақлли чиқиб, очиқ маълумотлар билан уларни солиштиради, танқидий таҳлил қилади. Ўзавто таклиф этаётган лойиҳа Хитойдагидан 3 баробар, Кореядагидан 2 баробар қиммат-ку, деб қолади масалан. Давлат раҳбарининг тасодифан кўзи тушиши мумкин. Бунга эса асло йўл қўйиб бўлмайди. Яъни айтмоқчиманки, бу аслида ўзбекистонликларни ахборот билан чеклаш эмас, Давлат раҳбарига альтернатив позициялар етиб боришини олдини олиш. Превентив профилактика. Лекин бу ҳали туб эмас. Туб алоҳида сервер, алоҳида қизил папкаларга етганда юз беради. Ахборот автократияларда цензуранинг мақсади, у махфийлик биланми, ёпиқлик биланми ва блурлаш билан амалга ошириладими, кенг халқ оммасини ахборотдан чеклаш эмас, биринчи шахсни, асосий қарор қабул қилувчини ахборотдан чеклашдан иборат бўлади.