Ҳеч бир ҳукумат ўз хоҳиши билан харажатларни қисқартирмайди Аллақачон амалга ошириб бўлинган ва тасдиқланган меъёрдан ошиб кетган харажатларни Парламент яна бир бор тасдиқлаб бериши керак. Бу практика янги Ўзбекистонда доимий анъанага айланиб бўлган. Ўзимизни алдашни бас қилишимиз керакки, ҳеч бир ҳукумат ўзини ўзи чекламайди, айниқса харажатлар борасида. Бунинг учун, ҳукуматни тийиб туриш учун вакиллик органи - парламент бор нормал давлатларда. Ҳозирги парламент деб аталмиш бунга қобил эмас. Яна ўзимизни ўзимиз алдашни бас қилишимиз керакки, харажатларни ошиб кетиши бош сабаби ижтимоий харажатлар эмас, Ижтимоий харажатлар ортида беркиниб олиш, хаспўшлашдан осони йўқ. Мард бўлиб, ошиб кетган моддаларни бирма-бир очиқлайлик. Ёки тан олайлик, бюджетга гидрадек ёпишволган бюрократиядан мисли кўрилмаган босим бор, лекин дисциплина йўқ. А корчалоннинг хоҳишлари учун таълимни кесиш, Б олигархнинг лойиҳалари учун армияни қисқартириш қолаяпти холос. Давлатнинг, айниқса очиқланмайдиган харажатларининг бошвоғи кўринмайди. Ўзбекистон иқтисодиёти миқёсидан катта давлат аппаратини ва улар билан боғланиб кетганларнинг паразит юкини бошқа кўтара олмайди. Не ажабки, тийиб туриш функциялари ичкаридан эмас, ташқаридан ишлаяпти. Хусусан, шукр қилиш керакки, ташқи қарз нархи кескин ошиб кетди (яқин йилларда арзонлашмай турсин), бўлмасам дефицит ўтган йилгидан кам бўлмасди. Осони чексиз-чегарасиз харажат қилишда давом этиб, дефицитни ташқи қарз билан ёпиб қўйиш бўларди.