​Қасамхўрларнинг қасами Бир тўп кекирган бойларнинг ва кети нозик чиновникларнинг овунчоғи бўлган Malibu'га XL биркасини ёпиштириб, қизил чизиқ тортиб, нархларни 6%гача кўтариш билан боғлиқ миллий чайқовчининг навбатдаги манипуляциясин кузата туриб, сизларнинг хотираларингизни титкилаб, жонлантиргим келди. Йўқ, сизга яна бир марта нормал давлатда антимонополия позиция ва техник кўрсаткичлар билан манипуляциялар орқали нарх оширган монополистни қайтиб бу ишга қўл урмайдиган қилиб жазолаган бўларди, дея бошингизни оғритмайман. Гап қасамхўр монополистнинг 3 йил аввалги ваъдаларини сизга яна бир бор эслатиш ҳақида. 2019 йил 7 июнь санасида "Ўзавтосаноат" Ахборот ва оммавий коммуникациялар агентлигида "Ўзбекистонда автомобилсозликни ривожлантириш стратегияси" тақдимотини ўтказган. Унда хусусан, биринчи 5 йилликда нархи 10 000 АҚШ доллари атрофида бўлган арзон автомобиллар ишлаб чиқарилишига эътибор қаратилиши эълон қилинган. Худди шу стратегия бир кун ўтиб Давлат раҳбарига ҳам тақдим этилган. Раҳбар автомобиллар нархини барқарор сақлаб, сифатини ошириш, янги ҳамёнбоп моделлар ишлаб чиқариш ва маҳаллийлаштиришни кенгайтириш орқали маҳсулотларнинг бозордаги ўрнини мустаҳкамлаш муҳимлигини таъкидлаган. Мана бу ҳаволада “2025 йилгача Ўзбекистон Республикаси автомобиль саноатини ривожлантириш концепцияси” лойиҳасини кўришингиз мумкин. Амалда нима бўлди? Амалда нархи 6-8 минг долларгача бўлган механика коробкали автомобилларни ишлаб чиқариш 2020 йил давомида, кейин 2021 йилда қуйи позициядаги 8-9 минг долларлик автомат коробкали ва якунда 2022 йилда 10 минг долларгача бўлган автомобиллар ишлаб чиқариш бутунлай тўхтатилди. 2022 йил кузидан буён Ўзбекистон истеъмолчилари малолитражкалар ва кичик бюджет автолари сотиб олиш имкониятидан бутунлай маҳрум бўлишган. Яъни ҳукумат ва унинг монополист эркатойи онгли равишда ва ҳатто ўзининг стратегик режаларига зид равишда 10 минг долларгача бўлган автоларни ишлаб чиқаришни тўхтатган. Буям майли. Агар бу сегментда маҳаллий ишлаб чиқариш бўлмаса, балки ҳукумат соғлом ақлга мурожаат қилган ҳолда малолитражкалар учун божларни бекор қилдими? Асло йўқ. Қайтанга кичик литражли ва тежамкор автомобиллар учун импорт божлари нисбатан олганда энг юқори даражада ўрнатилганича қолмоқда. Ижтимоий давлат эканимизни таъкидлайдиган ҳукумат бойлар ва чиновниклар учун махфий қарор асосида божсиз авто олиб келишга қўл уриб, ўртаҳол ва камбағаллар қўли етадиган автоларга эса аждарҳоча бож солишда давом этмоқда. Мен сизларга 7-9 минг долларлик KIA Picanto ё Skoda Rapid ҳақида қайта гапириб ўтирмайман, чунки Ўзбекистонга улар умуман келтирилмайди (балки айнан энг арзон автоларни келтирмаслик талаби билан бу ишлаб чиқарувчилар билан битим имзоланган). Рўпара келганим суратда кўраётганингиз Ўзбекистонда деярли 30 минг долларлик нархда сотилаётган малолитражка FIAT 500 Dolcevita. Уруш бўлаётган Украинада 16 минг доллар атрофида эканини кўришингиз мумкин. Энди қасамхўрларнинг қанчалар очофат эканини кўз олдингизга келтиринг.