​Back in the U.S.S.R. Ярим тунда эълон қилинган фармоннинг ҳамма тушунган шаклидан ташқари моҳиятга оид яна икки муҳим жиҳати бор. Уларнинг иккиси ҳам ғирт совокча, антибозор чоралар. Демак, энди экспортчилар оладиган ва сотадиган валюталари тўғрисидаги режа-графикларини Марказий банк ва Росфинмониторингга тақдим этишга мажбур. Рўйхатга тушган экспортчи компанияларга Росфинмониторинг кураторлари тайинланади. Кураторлар валютани тартибга солиш қоидаларига амал қилинишини назорат қиладилар. Мазкур чоралар 1991 йилгача Совет иттифоқида, кейинчалик нобозор мамлакатлар ҳисобланган Туркманистон, Беларусь ва эски Ўзбекистондаги валюта соҳасида иш юритувини эслатмаслиги мумкин эмас. Ҳақиқат учун айтиш керакки, Россия Марказий банки ҳам, Молия вазирлиги ҳам жамоатчиликнинг кучли босимига қарамасдан мажбурий сотув ва валюта чекловларига зарурият йўқлигини, фақат ва фақат бозор чоралари самарали бўлишини таъкидлаб келишаётганди. Тўсатдан ушбу популистик қарорга келинганини сиёсий сабаблар ва 2024 йил баҳоридаги "сайлов" билан тушунтириш мумкин холос. Лекин биз ўз тажрибамиздан биламизки, диктатура ва ёпиқ жамиятларда киритилган тақиқларнинг бекор қилиниши осон бўлмайди, қайтанга чекловлар чуқурлашиб, кенгайиб боради. Яна бир катта хавотир мазкур чоралар Россиянинг сассиқ бағридан чиқмай қолаётган давлатлар учун ҳам жозибалидек кўриниши билан боғлиқ.