НКМК кенгашининг янги аъзолари ким? Газета сўровига кўра, Навоий кон металлургия комбинатидан олинган қўшимча маълумотлар жудаям қизиқ ва улар янги саволларни туғдирмаслиги мумкин эмас. Таъкидланишича, НКМК кузатув кенгаши таркиби кенгашнинг охирги мажлиси ўтказилган 8 апрелдан кейин ўзгарган. Қизиқ, кенгашга кимлар кирган? "Мустақил аъзо"ми? Ё янги акциядор пайдо бўлган бўлса, унинг вакилими? Эслатиб ўтамиз, миллиардер Фаттоҳ Шодиевнинг қариндошларидан бўлган Олимжон Шодиев ўтган йили кенгашнинг мустақил аъзоси сифатида ишлаб келган. Яна бир қизиқ маълумот, НКМК учун 2022 йил апрелдан бошлаб ёпиқ қарор билан электр ва газ нархларининг, октябрдан бошлаб реагент нархларининг оширилиши харажатларнинг кескин ошиши сабаби этиб кўрсатилгани. Агар тарифлар ўтган йили ошгани ҳисобга олинса, НКМК молиявий аҳволи ўтган йили ёмонлашишни бошлаши керак эмасмиди? Лекин 2022 йилда НКМК рекорд даражада фойда олган (+36,2%), бюджетга тўлаган солиқ ва дивидендлари 33,3 трлн.сўмдан ошган. 2023 йилда 8 апрелга қадар амалда бўлган Кенгашнинг танқидидан кейин қайтадан ишлаб чиқилган Бизнес режага кўра ҳам соф фойда (14,0 трлн.сўм) 2022 йилдагидан кам бўлади. Бюджетга тўланадиган солиқ ва дивидендлар миқдори 31-33 трлн.сўмни ташкил этади. Яъни, бу йил Ўзбекистон бюджети НКМКдан камроқ тушум олади. Ёпиқлик, ҳисоботларнинг очилмаслиги мазкур ҳолатнинг туб сабабларини очилмай қолаверишига имкон қолдираверади. Комбинат вакилига кўра ремонт ишлари кейинга қолдирилган, шу орқали "харажатларни жиддий қисқартиришга эришилган". Бу келаси 2024 йилда НКМК харажатлари кескин ошиб кетишига ва молиявий натижалар янада ёмонлашишига тайёр бўлавериш керак деганими?