"Давлатнинг катта ҳажмдаги инвестицион лойиҳалари рўйхатини камайтириш вақти ҳам келди" Абдулла Абдукадировнинг Ўзбекистонда саноат сиёсати бўйича эълон қилган мақоласида айрим эпитетларга қўшилмаслик ҳам, моҳият бўйича баҳслашиш ҳам мумкин. Лекин нафақат ўтган ёмон замоннинг, янги даврнинг хатоларига оид қатор хулосалар илк марта очиқ айтила бошлаганини олқишламаслик мумкин эмас. "1992-2016 йиллар давомидаги хусусийлаштириш жараёнида Ўзбекистоннинг саноат потенциали кўп жиҳатдан йўқ бўлган" (2017 йилдан кейинги хусусийлаштириш бунданда бадтар оқибатлар яратаётганини қайд этишга ҳали вақт келмаган кўринади). "Иқтисодиёт ва саноат вазирлигининг асосий вазифаларидан бири (саноат ривожланиши истиқболларини ишлаб чиқиш) орадан 14 ойдан ўтгач, бутунлай бошқа йўна­лишга (камбағалликни қисқартириш) ўзгартирилиши иқтисодий бошқарувда приоритетлар кескин ўзгарганидан далолат берар эди" (Иқтисодиёт вазирлигининг Молия вазирлигига қўшилиши қандай янги чалғишлар яратди?) "Газ ишлаб чиқариш ҳажмлари мавҳум бўлиб турган шароитда GTL, MTO каби ҳар бири камида 3,0 млрд. м3 табиий газни талаб қиладиган (ҳозирги потенциалнинг 12-15 фоиз) лойиҳаларни амалга ошириш, импорт хомашёга умид қилиш – бун­дай лойиҳаларни ҳеч қачон фойдага чиқмаслигига ҳукм этиш дегани" (Ўзбекистоннинг қолган-қутган саноатига қўшиб келажагиниям барбод қилаётган шонли энергетикларга ва уларнинг валийнеъматларига ҳаққоний баҳо). "Бугунги кундаги факт шуки, бу соҳанинг барча истиқболлари Тебинбулоқ темир рудаси конини ўзлаштириш, ундан қазиб олиниши мумкин бўлган рудани қайта ишлаш, ҳамда иқтисодиётда ҳосил бўладиган иккиламчи металлни (металлолом) қайта ишлаш келажаги билан боғлиқ. Лекин иккиламчи металлни йиғиш ва давлатга сотиш монопо­лияси, ёки Тебинбулоқ кони эгалик ҳуқуқидаги амалиётдаги ноаниқлик­лар Ўзбекистон металлургияси келажагини тамоман қирқиши мумкин" (ўзбек энергетикасини ғорат қилганлар энди металлургияга қўлини тиққани ҳақида). "Ўзавтомоторс, "Artel" каби квазидавлат монополистлар сиёсати биз учун сабоқ бўлиши керак" (изоҳсиз). "Демакки, барча йирик капитал маблағларни талаб қилувчи ва импорт хомашёга асосланган лойиҳалар перспективасини янги мезонлар асосида қайта кўриб чиқиш, давлатнинг катта ҳажмдаги инвестицион лойиҳалари рўйхатини камайтириш вақти ҳам келди" (балки бутунлай воз кечиш афзалроқдир, давлатнинг инвестицион лойиҳалари фақат ва фақат инфратузилма билан боғлиқ бўлишини қабул қилган ҳолда).