Пропан савдосини кимлар эгаллаган Газета пропан нархлари каррасига ошгани сабаблари билан қизиққан ва йўл-йўлакай пропан савдосини кимларнинг қўлида жамланганлигига ҳам эътибор қаратган. Демак, 2024 йилнинг дастлабки 4 ойи, яъни сунъий равишда дефицит яралмасдан туриб, Ўзбекистон пропан бозорининг 94%ини ўзаро нотаниш бўлмаган тўртта гуруҳ назорат қилган: LUKOIL Overseas Supply and Trading 63%; Uz Gas Energy МЧЖ 14%; Ўзбекнефтегаз гуруҳи 14%, шундан: Ўзбекнефтегаз 8% Uzbekistan GTL 4% Шўртан ГКМ 2%. SEG TASCO МЧЖ 3%. Бу рўйхатда шимолдагиларга тегишли LUKOIL ва Ўзбекнефтегазга алоҳида изоҳ бериб ўтириш керак эмас. SEG TASCO МЧЖ швейцарияликми, кипрликми ё гонконгликми бўлган, офат юз берган Мустақилликнинг 25 йиллиги конидан тортиб, Газлидаги газ омбори, аввал Ўзбекнефтегазга тегишли бўлган нефть конлари, омборхоналари ва ФНҚЗгача бўлган саноқсиз активларни ўз назоратига ўтказиб олган инвесторга тегишли эканини зийрак ўқувчилар билса керак. Унда пропан бозоридаги бирданига иккинчи ўйинчига айланиб олган Uz Gas Energy МЧЖ кимнинг креатураси деб ўйлайсиз? Бу МЧЖ айни 2023 йилнинг аномал қишида, қаҳратон 24 январда очилган, бир йил ўтмасдан пропан савдосининг йирик ўйинчисига дўнган. Очиқ маълумотларга кўра, Uz Gas Energy МЧЖнинг ишлаб чиқариш заводи йўқ, шунга кўра, у ё ўртамчи ё рухсат этилган импортчи. Таъсисчилари ва аффилланган субъектлар орасида ўтмишдаги бразилиялик футболчи ва тренерларни олиб келиб ўйнатган ва кейинчалик банкрот деб эълон қилинган машҳур газтрейдернинг фамилиясига уйқаш номларни кўриш мумкин.